Nga shkrirja e Kuvendit, te rrëmbimi i armëve, Meta: Popullit i kanë mbetur vetëm tri rrugë

Rezoluta e Kuvendit, apel Kushtetueses e Metës për Xhaferllarin: Do ngarkohet me përgjegjësi kush guxon të ndërmarrë këtë veprim

Parlamenti miratoi dje me 97 vota pro, asnjë kundër, rezolutën që i kërkon Gjykatës Kushtetuese që të njohë Arta Vorpsin si anëtare të saj.

Sipas maxhorancës, Vorpsi u emërua anëtare e Gjykatës Kushtetuese duke plotësuar vakancën e dytë të shpallur nga Presidenti, pasi ky i fundit nuk u shpreh brenda 30 ditëve, që e përcakton neni 125 i Kushtetutës. “Kuvendi i Shqipërisë i bën thirrje, në radhë të parë Gjykatës Kushtetuese, të marrë përsipër përgjegjësinë e autoritetit që i nënshtrohet vetëm Kushtetutës, për të mos lejuar delegjitimimin institucional që me fillimin e veprimtarisë së tij, por të zbatojë urdhërimin kushtetues të renditjes së përcaktuar nga vendimi i Këshillit të Emërimeve në Drejtësi, që përcakton znj. Arta Vorpsi si gjyqtare të emëruar të Gjykatës Kushtetuese”, thuhet në rezolutë. Dokumenti final i miratuar të premten në një seancë jashtë radhe, pësoi ndryshime nga ai, i cili u miratua në Konferencën e Kryetarëve ditën e enjte. Draftrezoluta e ditës së enjte i kërkonte komisionit të posaçëm të hetimit ndaj Presidentit që të përfundonte sa më shpejt punën dhe të dërgonte në Parlament raportin. “Kuvendi i Shqipërisë i kërkon komisionit hetimor për shqyrtimin e kërkesës së 55 deputetëve të Kuvendit për shkarkimin e Presidentit të Republikës, të përmbyllë punën e tij brenda afatit të caktuar në vendimin e Kuvendit datë 03.10.2019 dhe të marrë në konsideratë gjatë punës së tij, edhe këtë situatë të krijuar nga Presidenti në lidhje me emërimin e anëtarëve të Gjykatës Kushtetuese”, shkruhej në draftrezolutë. Ky paragraf, ndërkohë u hoq në draftin final.

RAMA Kryeministri Edi Rama në fjalën e tij u përpoq ta injoronte sa më shumë debatin e ngritur mbi procedurën e zgjedhjes së anëtarëve të Gjykatës Kushtetuese.

Kryeministri akuzoi Presidentin Meta se kërkon të bllokojë ngritjen e Gjykatës Kushtetuese. Ndërkohë, për të konfirmuar se veprimet e Parlamentit kanë qenë të drejta, kreu i qeverisë tha se kanë qenë në koordinim më SHBAnë dhe Bashkimin Europian. “Për të gjithë ata që e ndjekin këtë episod të ri të historisë së vjetër të përplasjes së Ilir Metës me drejtësinë, dua të them se përpara se sa ne të vendosnim dhe të bënim atë që Kuvendi bëri, duke zgjedhur dy anëtaret e reja të Gjykatës Kushtetuese dhe duke marrë të mirëqenë zgjedhjen e një anëtareje tjetër, si rezultat i mospërmbushjes së detyrës për të zgjedhur në afatin e përcaktuar nga Presidenti i Republikës, ne jemi dakordësuar 100% me aleatët strategjikë dhe u jemi referuar 100% opinioneve të dhëna nga ekspertët e tyre, të cilët janë pjesë integrale e të gjithë procesit të Reformës në Drejtësi, ekspertët e EURALIUS- it dhe ekspertët e OPDAT- it”, tha Kryeministri Rama. Ndërkohë, kreu i qeverisë shtoi se Presidenti Meta nuk mund të interpretojë veprimet e Këshillit të Emërimeve në Drejtësi. Madje, ai bëri edhe një paralelizëm. “Nuk ka interpretime të mundshme në këtë proces, nuk ka zyra ligjore, as në Presidencë, as në Kuvend, as në Kryeministri, që mund të bëjnë interpretime dhe mund të thonë se Këshilli i Emërimeve në Drejtësi e ka gabim. Është njësoj si të mblidhet Kuvendi dhe të bëjë një interpretim se Gjykata Kushtetuese e ka gabim, apo të mblidhet qeveria dhe të bëjë një interpretim se një gjykatë ka vendosur gabim”, vijoi Kryeministri.

KÇK Kryeministri Edi Rama e përqendroi vëmendjen te grupi i prokurorëve dhe gjyqtarëve, që sipas tij, duke pritur vetingun po mundohen të kapin ç’të kapin. Ai tha se maxhoranca nuk e ka sfidën me Presidentin, i cili sipas tij ka humbur busullën, por me drejtësinë e korruptuar. Në vijim të deklaratave të mëparshme, Kryeministri Rama lajmëroi dje se më datë 25 nëntor do të prezantojë platformën kundër të ashtuquajturve KÇK. “Në 25 nëntor, unë do t’i prezantoj publikut shqiptar këtë platformë. Kjo platformë do të jetë sfida e vërtetë edhe e këtij Kuvendi, që do të ndajë në këtë sallë ata që janë gati për ta shpallur këtë luftë, me ata që s’janë gati. Do të ndajë njëherë e mirë një histori të vjetër, ku është përzier rëndom i njomi me të thatin dhe ku krimi i organizuar është kthyer nga një problem i përbashkët, në një motiv lufte politike; nga një armik i përbashkët, në një aleat politik i atyre që e kanë përdorur vijimësisht produktin e krimit, për ta hedhur si mish të ngordhur në oborrin tonë”, tha Kryeministri Rama. Platforma, sipas kreut të qeverisë, do t’u japë fund krizave artificiale të sajuara nga Presidenti.