Kushtetuesja nis me votim 2- 2, njihen si anëtare vetëm të betuarat te Presidenti
Lista për KED, akti që njeh Xhaferllarin si an ëtare. Përgjigjja për Kuvendin: Gjykata është e pavarur, i nënshtrohet vetëm Kushtetutës
Gjykata Kushtetuese iu përgjigj menjëherë kërkesës së rezolutës së Kuvendit të Shqipërisë, që kërkonte përcaktimin e Arta Vorpsit si gjyqtare kushtetuese dhe jo të Marsida Xhaferllarit.
Përmes një njoftimi në faqen e saj zyrtare, Gjykata Kushtetuese shprehet se nuk ka kuorumin e nevojshëm për të marrë në shqyrtim një interpretim kushtetues të kompetencave. “Jemi njohur me rezolutën e miratuar nga Kuvendi i Shqipërisë sot, në datën 15.11.2019, për ‘ Shmangien e krizës kushtetuese me synim legjitimitetin e Gjykatës Kushtetuese – detyrë imperative e organeve më të larta të shtetit’. Në citim të Kushtetutës, Gjykata Kushtetuese e Shqipërisë zgjidh mosmarrëveshjet kushtetuese dhe bën interpretimin përfundimtar të saj. Gjykata Kushtetuese i nënshtrohet vetëm Kushtetutës. Për sa më sipër, lidhur me rezolutën e miratuar nga Kuvendi i Shqipërisë, Gjykata Kushtetuese sqaron se, edhe pas plotësimit të disa prej vakancave në përbërjen e saj, nuk e ka ende kuorumin e nevojshëm për të shqyrtuar dhe vendosur në seancë gjyqësore lidhur me kërkesat që paraqiten përpara saj. Për këtë arsye, ajo nuk mund të ushtrojë kompetencat e saj thelbësore apo juridiksionale lidhur me zgjidhjen e konfliktit të kompetencave midis pushteteve apo organeve kushtetuese, si dhe as ato kompetenca që lidhen me shqyrtimin e kushtetutshmërisë së akteve të nxjerra nga organet e pushtetit publik”, thuhet në njoftimin e Gjykatës Kushtetuese. Përpos kësaj, gjykata shprehet se do të njohë si anëtare të reja të saj vetëm ato që janë betuar para Presidentit të Republikës. “Në këto kushte, Gjykata Kushtetuese si një institucion i pavarur, duke zbatuar Kushtetutën dhe ligjin e saj organik dhe legjislacionin në fuqi, si dhe praktikat administrative të ndjekura ndër vite, me qëllim sigurimin e kushteve normale për mbarëvajtjen dhe mirëfunksionimin e veprimtarisë së saj, është duke ndërmarrë të gjitha hapat e nevojshëm administrativë formalë për fillimin e detyrës së tre anëtarëve të rinj, pas betimit të tyre para Presidentit të Republikës”, përfundon reagimin e saj Gjykata Kushtetuese, në përgjigje të rezolutës së miratuar dje nga Kuvendi i Shqipërisë.
VOTIMI Gjykata Kushtetuese i dha zgjidhje ngërçit brenda saj, të krijuar nga përplasja mes Presidentit të Republikës dhe Këshillit të Emërimeve në Drejtësi, ku Arta Vorpsi dhe Marsida Xhaferllari pretendonin vendin vakant të një anëtari të kësaj gjykate. Ishte Arta Vorpsi, e cila i kishte dorëzuar një kërkesë anëtares më të vjetër të kësaj gjykate, Vitore Tushës, e cila ushtron dhe kompetencat e kryetarit të kësaj gjykate, përmes së cilës kërkonte mbledhjen e të gjithë anëtarëve për ta njohur atë si anëtare të Kushtetueses. Në mbledhjen e parë të bërë në këtë gjykatë, Tusha e ka hedhur në votim propozimin e Vorpsit, ku kanë marrë pjesë katër anëtarë: Vitore Tusha, Besnik Muçi, Fiona Papajorgji dhe Elsa Toska. Marsida Xhaferllari, e cila ishte prezente dje në Gjykatën Kushtetuese, nuk ka marrë pjesë në votim, duke e konsideruar veten në konflikt interesi. Në këtë mënyrë, Tusha dhe Muçi kanë qenë kundër njohjes së Arta Vorpsit si anëtare të kësaj gjykate, ndërsa Toska dhe Papajorgji kanë qenë pro saj. Në një votim në barazim, 2 me 2, kërkesa e Arta Vorpsit është konsideruar e rrëzuar, duke bërë që Marsida Xhaferllari të marrë vendin vakant të anëtarit të Gjykatës Kushtetuese.
LISTA Gjykata Kushtetuese zyrtarizoi dje përbërjen e saj me pesë anëtarë, përmes një njoftimi dërguar Presidentit të Republikës dhe Kuvendit të Shqipërisë, ku jep emrat e anëtarëve të saj që plotësojnë kushtet për anëtarë të Këshillit të Emërimeve në Drejtësi. “Në mbështetje të nenit 221, të ligjit nr. 115/ 2016, ‘ Për organet e qeverisjes së sistemit të drejtësisë’, i ndryshuar me ligjin nr. 47/ 2019 ‘ Për disa shtesa dhe ndryshime në ligjin nr. 115/ 2016 ‘ Për organet e qeverisjes së sistemit të drejtësisë’, sot, më 15.11.2019, Gjykata Kushtetuese i ka dërguar institucionit të Presidentit të Republikës dhe Kuvendit të Shqipërisë listën e gjyqtarëve të Gjykatës Kushtetuese, që plotësojnë kushtet e parashikuara në ligj për të qenë anëtarë të Këshillit të Emërimeve në Drejtësi: Vitore Tusha, gjyqtare me kompetencat e kryetarit të Gjykatës Kushtetuese; Besnik Muçi, gjyqtar; Elsa Toska, gjyqtare; Marsida Xhaferllari, gjyqtare; dhe Fiona Papajorgji, gjyqtare”.
Gjykata Kushtetuese sqaron se, edhe pas plotësimit të disa prej vakancave në përbërjen e saj, nuk e ka ende kuorumin e nevojshëm për të shqyrtuar dhe vendosur në seancë gjyqësore lidhur me kërkesat që paraqiten përpara saj