Meta me tone të ashpra, nga shpërndarja e Kuvendit, te thirrja për rrokjen e armëve
Presidenti çon për ndjekje penale kreun e KED: Ushtar i verbër i partisë, shpërdoroi detyrën, ushtroi veprimtari antikushtetuese
Presidenti i Republikës, Ilir Meta, me një gjuhë të ashpër, kërcënoi me shpërndarje të Parlamentit dhe rrokjen e armëve nga populli nëse preket Gjykata Kushtetuese.
Gjatë paradites, kur Kuvendi kishte nisur punimet e tij në një seancë jashtë radhe për miratimin e një rezolute kundër dekretimit prej tij të Marsida Xhaferllarit, Meta e cilësoi Parlamentin një bandë uzurpatore. "Pavarësisht nga deformimet e pandershme që janë bërë në pabesi ndaj vullnetit të popullit shqiptar gjatë këtyre 21 viteve, kam një paralajmërim të fundit për gjithë ata që mendojnë se betimi i Ilir Metës me dorën mbi Kushtetutë ka qenë një proces formal apo ceremonial. Nuk ka institucion më të rëndësishëm në Republikën e Shqipërisë sesa Kushtetuta e Republikës së Shqipërisë, e cila ka vetëm një garant të padiskutueshëm e të pacenueshëm në integritetin e vet, qe është Gjykata Kushtetuese. Përpjekjet për të dhunuar Kushtetutën në përpjekje për të kapur përfundimisht gjithë sistemin e drejtësisë me kapjen e GJK janë të dështuara, janë të vdekura. Askush të mos guxojë të përdhosë Gjykatën Kushtetuese të Republikës së Shqipërisë! Është institucioni më i rëndësishëm i këtij vendi. Parlamenti me një dekret shpërndahet! Qeveria me një mocion mosbesimi rrëzohet! Presidenti, me një ' impeachment' nga një Parlament, jo nga ky, përsëri shkarkohet nga Gjykata Kushtetuese e Republikës së Shqipërisë. Nëse dikush mendon se angazhimet e mia kanë qenë ceremoniale duhet t'i bëjë të qartë se në fund fare kjo është Kushtetutë që mbron popullin dhe do jetë detyra e Presidentit që t'i tregojë vendin kësaj bande uzurpatore". Pyetjes se me këtë kërcënim, a po paralajmëron shpërndarjen e Parlamentit, Meta tha se do t'i drejtohet popullit. "Jam i qartë, secili të shikojë detyrën e vet, detyra do jetë e Presidentit dhe në momentin e duhur Presidenti do t'i drejtohet popullit dhe gjithë botës për të mbrojtur demokracinë që është dhunuar në mënyrë barbare, sidomos në këto dy vite që u la pa GJK vendi".
PADIA PENALE
Kreu i shtetit, Meta, doli përsëri dje pasdite në një konferencë për mediat nga Presidenca, ku lajmëroi se do të depozitonte padi penale ndaj kreut të KED, Ardian Dvorani, për shpërdorim detyre. "Dëshiroj t'ju bëj me dije vendimin tim si President dhe kryetar i shtetit, për të paraqitur ditën e hënë kallëzim penal si Presidenti i Republikës kundër zotit Ardian Dvorani, me detyrë kryetar i Këshillit të Emërimeve në Drejtësi, kallëzim në Gjykatën e Lartë. E akuzoj për këto vepra penale: 1- shpërdorim detyre, neni 248 i Kodit Penal; 2 - përvetësimi i titullit apo detyrës shtetërore, 246 Kodi Penal", tha Meta. Duke folur për shkeljet e tij të ligjit, Meta tha se Ardian Dvorani rrezikon deri në 7 vite burg. "Dërgimi për botim i një akti të Këshillit, krijoi bindjen te Presidenti se kreu i KED i ka kryer të gjitha këto veprime jo nga pakujdesia, por me qëllim vënien para shkeljes së Kushtetues së kreut të shtetit. Kreu i KED ka shkelur hapur dhe me dashje parashikimet e Kushtetutës. Paralajmërimet e Institucionit të Presidentit kanë qenë sistematike për të parandaluar këtë situatë. Veprimet dhe mosveprimet e kundërligjshme të Dvoranit. Edhe pse ka qenë i paralajmëruar nga Presidenti i Republikës, por edhe gjatë mbledhjes së KED, rezulton se Dvorani ka kryer një veprimtari antikushtetuese, sjellje të tij në kundërshtim me ligjin, veprimet e tij nuk janë pjesë e funksionit të tij dhe përbëjnë vepër penale. Kryerja e veprimeve me dashje ose me dashje në kundërshtim me Kushtetutën është shumë herë më i rëndë. Në këto kushte, Presidenti paraqet kallëzim penal pranë organit të akuzës me qëllim vënien në hetim të kreut të KED, Dvoranit", tha Meta.
REBELIMI
Presidenti Meta tha dje se me gjithë këto tentativa për të kapur gjithçka nga ana e maxhorancës, përfshirë edhe Gjykatën Kushtetuese, qytetarëve u mbetet vetëm të rrëmbejnë armët. "Tani kanë mbetur vetëm tri rrugë nëse Presidenti do pranonte këtë gjë. Ose njerëzit të marrin armët, që është e dënueshme dhe e papranueshme, ose të bëhen skllevër njëpartiakë që e kanë provuar 40 vjet, ose të ikin të gjithë jashtë nga Shqipëria… Të gjitha janë të papranueshme, por ato dy të fundit për mua tmerrësisht të papranueshme. Kështu që është detyra e Presidentit që të mbrojë këtë proces mjaft të rëndësishëm kushtetues të ndërtimit të Gjykatës Kushtetuese. Presidenti ka qenë mjaft bashkëpunues në këtë proces. Nuk ka institucion në botë që mund të guxojë të dalë kundër dekretit kushtetues të Presidentit. Nëse ka një institucion që del kundër kësaj, atëherë do të dëgjoni edhe përgjigjen e Presidentit Meta. Unë nuk kam ndërmend të tallen me Kushtetutën e Republikës së Shqipërisë. Te Gjykata Kushtetuese vija është e kuqe dhe është e kuqe flakë", tha Meta
NDËRKOMBËTARËT
Kreu i shtetit iu përgjigj edhe deklaratave të Kryeministrit se ka mbrojtjen e partnerëve ndërkombëtarë, si SHBA dhe BE. "Mos i keqpërdor më SHBA, diplomatë e kështu, ekspertë si ata që firmosën për PPP në mënyrë antikushtetuese. Le të përdorë sa të dojë, por Kushtetutën e Shqipërisë e kemi bërë me SHBA, BE dhe Komisionin e Venecias, sepse përndryshe do të ketë hetim ndërkombëtar për këtë çështje dhe ndëshkim ndërkombëtar për këtë çështje, sepse ka dy vite që është sabotuar qëllimisht KED, që ky person që u vu në krye të KED të bëjë këto veprime", tha Meta.