Votimi për Xhaferllarin ngre dyshime për punën e KED
Anëtarët e tjerë të Këshillit dhanë vlerësim të konsiderueshëm
Anëtarja e Gjykatës Kushtetuese, Marsida Xhaferllari, e dekretuar nga Presidenti Ilir Meta, gjatë procesit të vlerësimit nga KED, është vlerësuar me zero pikë për integritetin etik dhe moral nga Ardian Dvorani dhe Arta Marku.
Votimi i Dvoranit dhe Markut ka një diferencë të dukshme me atë të anëtarëve të tjerë, të cilët kanë dhënë pikë të konsiderueshme për këtë kandidate. Xhaferllari u rendit e katërta në listën zyrtare të Këshillit të Emërimeve në Drejtësi, duke lënë pas prokurorin e Krimeve të Rënda, Besnik Muçin, aktualisht anëtar i Kushtetueses dhe gjyqtaren e Tiranës, Regleta Panajoti. Ish- inspektorja e lartë e Drejtësisë u dekretua nga Presidenti në një kohë që Kuvendi, duke iu referuar përfundimit të afatit 30- ditor për Presidentin, njohu si anëtare Arta Vorpsin. Të vëna kështu në qendër të ngërçit të krijuar prej ditësh me ngritjen e Gjykatës Kushtetuese, Xhaferllari dhe Vorpsi u paraqitën dje në Gjykatë. Nga ana tjetër, në një njoftim zyrtar, për gjyqtarët që plotësojnë kriteret për garën e KED 2020, Kushtetuesja njohu si anëtare Marsida Xhaferllarin. Ndërkohë, dy ditë më parë, KED, me anë të një njoftimi që në fund mbante emrin e Ardian Dvoranit, njihte Vorpsin si anëtare të Kushtetueses. Dvorani e konsideronte dekretimin e Xhaferllarit si në kundërshtim me ligjin, pasi Presidenti nuk mund të "zgjedhë një kandidat, që është i renditur i katërti në listë".
VOTIMI
Por duket se Marsida Xhaferllari nuk ka marrë vlerësimin dhe mbështetjen e kreut të KED dhe anëtares Arta Marku që në fazat e para të procesit. Aktualisht, anëtarja e re e Kushtetueses ka marrë nga Dvorani 61 pikë në total, krahasuar me pikët që ka marrë nga anëtarë të tjerë të KED, 91 apo 93 pikë. Vlerësimi mes anëtarëve ka një diferencë të madhe, që më e pakta ngre dyshime për profesionalizmin e anëtarëve në zhvillimin e procesit. A duhej lejuar kandidimi i Xhaferllarit nëse meritonte zero pikë për moralin dhe integritetin? A do të merrte kjo kandidate pikë të konsiderueshme nga anëtarë të tjerë të KED?
DYSHIMI PËR FIGURËN
Duke iu referuar vendimit të lejimit të kandidimit të Xhaferllarit, problem është bërë një raport i DSIK, i klasifikuar si sekret, ku konstatonte se kishte të dhëna që kjo kandidate ishte e përfshirë në një rast korroptiv për një ngjarje të 10 viteve më parë. Dvorani dhe Marku kanë votuar kundër lejimit të kandidimit të mëtejshëm, por Këshilli, si organ kolegjial, ka vendosur që raporti i DSIK nuk kishte asnjë të dhënë konkrete, nga ana tjetër vetë Xhaferllari ka paraqitur para KED certifikatat e sigurisë të lëshuara nga DSIK ndër vite ku ka rezultuar e pastër. Kujtojmë se Marsida Xhaferllari ka qenë prej vitesh Kryeinspektore e Lartë e Drejtësisë dhe për funksionin që mbante është pajisur me certifikata të sigurisë.