Basha: Rama do të kapë Gjykatën Kushtetuese, aty vendoset fati i 30 qershorit

Kreu i PD: Vendi ka nevojë për Gjykatë Kushtetuese, PS t'i thërrasë mendjes dhe të ndalë lojërat e rrezikshme

Kryedemokrati Basha akuzoi Edi Ramën se kërkon të kapë Gjykatën Kushtetuese, sepse aty vendoset fati i zgjedhjeve të 30 qershorit.

Gjatë një konference për mediat gjatë mbrëmjes së djeshme, Basha tha se kapja e drejtësisë së re për qeverinë e Edi Ramës është kthyer në një rregull. "Në këtë kuadër duhet parë i gjithë ky teatër treditor me Gjykatën Kushtetuese. Edi Rama e kishte jetike kapjen e Gjykatës Kushtetuese sepse e dimë të gjithë që Gjykata Kushtetuese duhet të gjykojë mbi disa çështje shumë të rëndësishme, disa prej tyre urgjente; siç është çështja e 30 qershorit, farsës kriminale të 30 qershorit, siç është çështja e iniciativës për të kapur institucionin e Presidentit, duke shkarkuar Presidentin aktual. Sepse kështu i është tekur, për të mos lënë asnjë institucion pa kapur", tha Basha. Por sipas kreut të selisë blu, përpjekja e Kryeministrit është e dështuar pasi ngritja e Kushtetueses është një nga 9 kushtet e vendosura nga Bundestagu gjerman në tetor, kështu që Rama, sipas Bashës, do ta ketë të pamundur të gënjejë Parlamentin gjerman. "Ai dhe ata që mendojnë se kushtet e Bundestagut mund t'i gënjejnë me një letër bakalli ' U kry!', dhe pastaj me letrën e bakallit të trokasin për të hapur derën e Europës, do të kenë të njëjtin zhgënjim dhe të njëjtin rezultat që kemi pasur këto vite. Dhe përgjegjësi është i vetmi njeri që për interesin e pushtetit të tij dhe për interesat e tij personale po bllokon dhe merr peng rrugën europiane të Shqipërisë", vijoi Basha.

APELI Teksa vijoi me akuzat ndaj Kryeministrit Edi Rama se ka kapur Prokurorinë dhe po vonon ngritjen e BKH dhe SPAK, Basha iu bëri apel socialistëve që të ndalin përpjekjet, të cilat, sipas tij, pengojnë institucionet e drejtësisë. "Ndaj, duke marrë parasysh se vënien në funksion të Gjykatës Kushtetuese, thirrja ime parë ndaj PS është: T'i thërrasë mendjes dhe të ndalë lojërat e rrezikshme, lojërat politike dhe të lejojë funksionimin normal të kësaj Gjykate. Shqipëria ka nevojë jetike për një gjyqësor dhe për një drejtësi të pavarur. Sot jemi në një situatë ku prej tri vitesh vonohen hapat që do të mundësonin realizimin e objektivave të Reformës në Drejtësi. SPAK dhe BKH janë jetike në luftën kundër krimit dhe korrupsionit", vijoi Basha. Kreu i selisë bu për herë të dytë u ka çuar një mesazh ndërkombëtarëve sa i përket Reformës në Drejtësi. Basha thekson se më e rëndësishme se shpejtësia e krijimit të institucioneve të reja të drejtësisë, është cilësia e tyre. Po ashtu, Basha iu bëri thirrje diplomatëve në Tiranë të sqarojnë qëndrimin e tyre pas deklaratave të Kryeministrit se ka vepruar për Gjykatën Kushtetuese në koordinim me SHBA dhe BE. "Nuk besoj se Rama i ka bërë këto, se kështu e kanë këshilluar ndërkombëtarët. Besoj se këto janë dështime të plota dhe të mynxyrshme të një njeriu; Edi Ramës. Pasta, j ai fshihet pas të tjerëve, u takon të tjerëve të sqarojnë pozitat e tyre, nuk i sqaroj unë pozitat e askujt dhe as komentoj. U takon atyre, të cilët ai i përgojon që të sqarojnë dhe mirë është të sqarojnë pozitat e tyre. Por unë nuk mund të hyj në lojën e Edi Ramës, sepse këtë tha edhe atëherë: ku ka kanabis? Ja, ndërkombëtarët thonë se s'ka kanabis!", vijoi Basha

DALJA NGA KRIZA Lulzim Basha e konsideron ilegjitim Parlamentin aktual. Sipas tij, denoncimet e bëra publike me dosjen "184" dhe "339" dëshmojnë se Edi Rama e ka marrë pushtetin me ndihmën e krimit dhe jo me vullnetin e qytetarëve. Ndaj, sipas tij, duhen sa më shpejt zgjedhje të parakohshme për t'u dhënë mundësi qytetarëve që të zgjedhin se kush do t'i qeverisë. Ndërkohë, sa i takon ftesës së OSBE- së për tryezën e Reformës Zgjedhore, të martën Basha tha se PD është e gatshme, por maxhoranca e kushtëzon. "Dua ta përsëris sot atë që ju kam thënë disa herë, se Partia Socialiste refuzon dhe kushtëzon bashkëveprimin për të plotësuar këtë kusht të Bundestagut, që është Reforma Zgjedhore. Pra, është PS dhe Edi Rama, siç e dinë fare mirë edhe përfaqësuesit e faktorit ndërkombëtar, ata që janë bërë pengesë për çuarjen përpara të punës për Reformën Zgjedhore", përfundoi kreu i PD- së.