Basha: 100 milionë euro për t'u subvencionuar drejtpërdrejt te fermeri
Ndalesa e radhës e kryedemokratit Basha në turin e dëgjesave me biznesin ishte në Urën Vajgurore. Nga atje, kreu i selisë blu akuzoi Kryeministrin Edi Rama se nuk ka mbështetur fermerët, por ka favorizuar importet. Kjo situatë, sipas kreut të opozitës, po çon drejt falimentimit fermerët. Ndërkohë paraqiti planin e PD- së me 5 pika për fermerët. "Ndryshimet e TVSHsë do të marrin fund. Terrori për të pajisur fermerin me NIPT do të marrë fund. Fermeri do të identifikohet me nr. personal të identifikimit. Çdo vit do të ndajmë 100 milionë euro në buxhet vetëm për t'ju subvencionuar dhe që nuk do të kalojë nëpërmjet grumbulluesve, por drejtpërdrejt te fermeri në bazë të prodhimit. Subvencionim fiks për çdo tonelatë prodhim. Ky subvencion do të paguhet. Aksesi i prodhimeve tuaja në treg do të jetë i garantuar. Nuk do të ketë më barriera, monopole dhe trarë të fshehur që çojnë në kalbjen e produkteve", tha kryedemokrati Basha. Subvencionet nuk është e vetmja politikë e PD- së, sipas Lulzim Bashës. Ai premtoi edhe lehtësira të tjera sa i përket infrastrukturës në bujqësi. "Në infrastrukturë, siç do të rezervojmë 100 milionë euro për subvencionet, do të rezervojmë 50 milionë euro çdo vit. Ky do të jetë minimumi. 50 milionë euro infrastrukturë në shërbim të bujqësisë, duke filluar nga rrugët kryesore, në sera dhe ara, në vaditje, kanalizimet, mbështetje me energji elektrike, mbështetje me impiantet e përpunimit bujqësor, çdo vit 50 milionë euro infrastrukturë ndihmëse", tha Basha në bashkëbisedim me fermerët. Këto mbështetje ndaj fermerëve, sipas Bashës, do të bëjnë që Shqipëria të jetë konkurruese me rajonin, në mënyrë që përveçse të plotësojnë nevojat vendëse, të munden edhe të eksportojnë.