Don Luigi Ciotti: Vilat e mafiozëve bëjini shkolla e çerdhe
Paratë dhe asetet që iu konfiskohen krimit, mund t'i kthehen shoqërisë. Vilat e mafiozëve mund të bëhen kopshte, çerdhe apo qendra sociale. Kjo sjell jo vetëm të mira ekonomike, por edhe mundësi për punësimin e të rinjve, duke u dhënë dinjitet atyre. Don Luigi Ciotti, Presidenti i shoqatës "Libera", një rrjet organizatash, lëvizjesh, shkollash dhe sindikatash të angazhuara në luftën kundër mafies, korrupsionit dhe krimit të organizuar, thotë se Shqipëria mund të ndjekë shembullin Italisë në këtë drejtim. "Ndryshimi që në kërkojmë ka nevojë dhe për kontributin e shoqërisë civile. Në Itali, ligji për përdorimin social i aseteve të konfiskuara nga mafiozët dhe të korruptuarit dhe që i kthehen shoqërisë është kërkuar nga poshtë. Ne kemi mbledhur një milion firma, një milion qytetarë, kanë thënë se pasuritë e mafiozëve duhet të jenë të mira të përbashkëta. Sot, disa vila të bosëve të mafias janë bërë çerdhe, kopshte, qendra për të moshuarit, pra, janë ligje që janë kërkuar nga njerëzit dhe janë ndërtuar bashkë. E rëndësishme është t'ua heqim krimit dhe të korruptuarve frytet e dhunës së tyre dhe t'ua kthejmë qytetarëve. Kjo ka një vlerë, etike, kulturore, sociale, por edhe ekonomike. Për shembull, sot disa terrene në dorë të bosëve të mafies, janë bërë kooperativa ku punojnë të rinjtë dhe produkti është kudo në vend. Kjo u jep punë dhe dinjitet atyre", tha ai. I pyetur se në cilët sektorë investon mafia, Ciotti thotë se ajo është kudo ku gjen hapësira për të pasur pushtet. "Sot, mafien e gjejmë në financën e Europës. Por në territore, mbeten format më tradicionale dhe mafiozet e të korruptuarit, mbërrijnë atje ku nuhasin se mund të bëhet biznes, se mund të kenë pushtet", vijon ai. Don Luigi Ciotti ndodhet në Shqipëri si pjesëmarrës në konferencën me temë "Administrimi, menaxhimi dhe përdorimi i pasurive të sekuestruara e konfiskuara", organizuar nga Ministria e Drejtësisë.