Kushtetuesja, Rama e vendos veten në anën e duhur të historisë. Meta paralajmëron: Kam video
SURPRIZA E PABESUESHME, PRESIDENTI FTON FONDACIONIN “SOROS” NE TAKIM
Përballja e Presidentit Meta dhe maxhorancës këtë të shtunë ka vijuar me një paralajmërim të fortë të kreut të shtetit.
Përmes një postimi në rrjetet sociale, Presidenti Meta ka veçuar disa pjesë nga deklarata e tij për mediat, ku përmend sensitivitetin që kjo çështje ka për vendin. Për Metën, me Kushtetutën, e cila u votua me konsensus nga të gjithë deputetët në korrikun e 2016- ës, nuk mund të tallet askush dhe se ajo është vija e kuqe për çdo kënd. “Unë nuk kam ndërmend të tallem me Kushtetutën e Republikës së Shqipërisë, boll janë tallur me Kushtetutën e Republikës së Shqipërisë, që u votua me konsensus. Te Gjykata Kushtetuese vija është e kuqe dhe është e kuqe flakë”, shprehet Meta në videon e postuar në “Facebook”. Ndërsa në një video të dytë, Meta thekson se me këtë çështje duhet pasur kujdes, pasi në të ardhmen mund të ketë hetim ndërkombëtar. “Kushtetutën e kemi bërë me SHBA, e kemi bërë me BE, edhe e kemi bërë me Komisionin e Venecias dhe tepër të qartë, aq më tepër për këtë çështje. Sepse përndryshe do të ketë hetim ndërkombëtar për këtë çështje dhe do të ketë edhe ndëshkim ndërkombëtar për këtë çështje. Sepse ka dy vjet që është sabotuar funksionimi i KED- it, 2017, 2018, për të ardhur këtu që ky person, i besuari i partisë të bëjë gjithë këto veprime dhe gjithë këto manipulime, kaq të qarta për çdo njeri dhe që do të sqarohen edhe më tej në ditët e ardhshme”, shprehet Presidenti. Sakaq, zëdhënësi i Presidentit, Tedi Blushi, në rrjetet sociale ka bërë një paralajmërim të fortë se krahas denoncimit për kryetarin e KED- it, pritet që shumë shpejt të publikohet edhe një video, që sipas tij do t’u japë përgjigje shumë pikëpyetjeve të ngritura në ditët e fundit. “Pa asnjë diskutim, ditën e hënë do të bëhet kallëzimi penal, madje po administrohen prova të reja përvëluese, që shtojnë mundësinë për të pasur edhe padi për persona e zyrtarë të tjerë. Gjithashtu, ju bëj me dije se brenda javës, institucioni i Presidencës do të publikojë një video me fakte të pakundërshtueshme për opinionin vendës dhe botëror, që të mos ngelet asnjë analfabet në planet, i cili të mos e kuptojë dhunimin që një bandë ka tentuar t’i bëjë Kushtetutës dhe Gjykatës Kushtetuese të Republikës së Shqipërisë”, shkruan Blushi ndër të tjera.
FTESA Përveç këtyre deklaratave dhe ftesës për opozitën, Presidenti Meta ka surprizuar dje, teksa u ka dërguar një ftesë për takim edhe përfaqësueseve të Fondacionit të Shoqërisë së Hapur, “Soros”, në Shqipëri. Kjo ftesë e Metës për përfaqësuesit e këtij fondacioni i ka befasuar të gjithë, pasi vetëm pak muaj më parë, kreu i shtetit lëshonte akuza të ashpra në drejtim të themeluesit të këtij fondacioni, Xhorxh Sorosit. “Unë kam një mesazh për Soros, jetë të gjatë dhe kurdo është i mirëpritur edhe këtu t’i gëzojë miliardat e veta. Të investojë edhe në Shqipëri, se nuk jam i racës së Gruevskit, jam i Shqipërisë dhe do t’i dal për zot. Jam i racës së Avni Rustemit, Mic Sokolit dhe Vojo Kushit”, deklaronte Presidenti Meta në daljen e tij për shtyp në muajin korrik. Bashkë me përfaqësuesit e Fondacionit “Soros”, Meta ka thirrur edhe organizata të tjera të Shoqërisë Civile, që kanë kontribuuar për Reformën në Drejtësi.