“Krisje” në bashkëpunimin SHBA- BE për dialogun Kosovë- Serbi
Rikthimi i dialogut mes Kosovës dhe Serbisë dhe gjetja e një marrëveshjeje mes dy vendeve të rajonit ka përfshirë këtë vit në dialog edhe Shtetet e Bashkuara, krahas Bashkimit Europian. Dy më të fuqishmit e BE- së, Franca dhe Gjermania, janë përpjekur të dialogojnë me liderët e Serbisë dhe Kosovës për të parë se si mund të rikthehen “me një mendje të mirë” në dialogun mes tyre. Përfshirjen e drejtpërdrejtë të SHBA- ve në dialog, publikisht Franca dhe Gjermania, por edhe strukturat e BE- së, e kanë pritur me deklarata pozitive bashkëpunimi. Mirëpo, në praktikë situata duket më e komplikuar. Për takimin mes Presidentit francez, Emmanuel Macron, Presidentit të Kosovës, Hashim Thaçi, dhe homologut të tyre serb, Aleksandar Vuçiç, përfaqësuesi i SHBA- ve thotë se nuk ka marrë asnjë informacion nga Presidenca franceze. Takimi u mbajt për vazhdimin e dialogut, nuk ishte një takim formal e megjithatë, bashkëpunimi e kërkon që çështjet kryesore të diskutimit të komunikohen edhe me palët e tjera të përfshira për vazhdimin e dialogut. I deleguari special i Donald Trump, Richard Grenell, ( ambasador i SHBA në Gjermani) është mbajtur në terr për takimin e 12 nëntorit në Paris. Dick Custin, pjesë e Kabinetit të Përfaqësuesit Special të Negociatave për Paqe Kosovë- Serbi, ambasadori Richard Grenell, sipas “Express”, ka konfirmuar se francezët s’i kanë kontaktuar fare amerikanët për takimin e fundit të Thaçit me Vuçiç. Madje, Grenell nuk është kontaktuar nga Macron as për planet rreth një takimi të mundshëm Kosovë- Serbi në janar të vitit 2020, një nismë e zbuluar nga Aleksandar Vuçiç pas takimit në Paris. Nëse ka vërtet një “krisje” të bashkëpunimit mes drejtuesve të dialogut, gjasat nuk janë të mira as për zgjidhjen mes Kosovës e Serbisë.