Deshamp: Duam vendin e parë, Shqipëria ka cilësi
Trajneri i Francës, Didie Deshamp, doli në sallën e konferencave të stadiumit "Air Albania", në vigjilje të sfidës ndaj Shqipërisë. Deshamp u shpreh se ka vlerësim për Shqipërinë, duke deklaruar se kuqezinjtë do të kërkojnë të paraqesin identitetin e tyre, në një takim ku gjithashtu inaugurohet edhe stadiumi i ri. "Komani nuk është i disponueshëm, kështu që morëm vendim që ai të jetë i gatshëm për klubin e tij, Bajernin e Mynihut. Do të thosha që nesër ( sot) do të jetë një ndeshje e fortë, pasi ata ( shqiptarët) do të luajnë në fushën e tyre, në inaugurimin e stadiumit dhe do të manifestojnë dashurinë e tyre për futbollin. Faktikisht, unë mund të përzgjedh vetëm lojtarë francezë, jo shqiptarë ( qesh...). Do thosha që ju keni lojtarë shqiptarë të një cilësie të mirë, duhet ta pohoj këtë. I referohem edhe humbjes që pësuam në Elbasan 1- 0. Duhet të them se lojtarët shqiptarë kanë një cilësi të mirë. Ne duhet të marrim vendin e parë, pastaj shorti është short. Duhet të punojmë që të mundim ekipet e tjera. Unë besoj se ekipi im nesër ( sot) do të bëjë një performancë të mirë ndaj Shqipërisë së motivuar. Mbape është një lojtar klasi, që bën diferencën, por duhet thënë se kiliani është pjesë e një grupi. Unë kam diskutuar me të edhe kur ai merr nismat individuale, por varet dhe nga lojtarët që ai ka në krah në ato momente. Por, duhet thënë se është një lojtar që bën diferencën. Do të thosha se edhe për nesër ( sot), unë pres dhe ndihmësi im e ka përgatitur ndeshjen, që ekipi im të marrë një rezultat pozitiv. Ndeshjen e Shqipërisë me Andorrën e kam parë, pasi duhet të përshtatej skema për sfidën e ardhshme", tha Deshamp.