Suel Çela shpallet i pafajshëm
Gjykata: Nuk u provua që Çela ishte i pranishëm në vendngjarje
Pas një procesi, i cili nisi me akuzën e "Vrasjes së punonjësit të Policisë", mbetur në tentativë për dy nga të pandehurit, Enea Bekteshin dhe Suel Çelën, e që përfundoi në pretencë me akuzë të ndryshuar nga prokurori, Gjykata arriti në përfundimin se prania e Çelës në ngjarjen e shtatorit të 2017- ës nuk ishte provuar. Nga ana tjetër, treshja gjykuese argumentoi se, duke iu referuar provave dhe fakteve të paraqitura, Enea Bekteshi është gjetur fajtor për "Kundërshtim të punonjësit të Policisë" dhe "Prodhim dhe shitje të narkotikëve", duke e dënuar atë me 6 vite burg. "Duke iu referuar provave dhe fakteve, është provuar që në makinën "Audi" ka qenë i pandehuri Enea Bekteshi. Ky i fundit, pasi ka shoqëruar në aeroport vëllain e Suel Çelës, kur është kthyer ka marrë për xhiro makinën "Audi" dhe kur është kthyer rreth orës tetë në treg ka ndodhur ngjarja, ku ka kundërshtuar dhunshëm punonjësit e Policisë. Sa i takon provës që konsiston në shenja gishtash, duke iu referuar procesverbaleve të këqyrjes, këto shenja janë gjetur në pjesën e brendshme të pasqyrës në krahun e shoferit dhe jo në pjesën e pasagjerit, çka vërteton qenien e tij në makinë. Një fakt i tillë mbështetet edhe nga një përgjim ambiental, që i është bërë Enea Bekteshit në komisariat me kunatin e tij", lexoi gjyqtari vendimin e shkurtuar. I fajshëm u shpall edhe i pandehuri tjetër në këtë proces, Kelment Xhaferri, për "Armëmbajtje pa leje" dhe "Largim nga vendi i vuajtjes së dënimit" dhe u dënua me 5 vite burg në total.
PAFAJËSIA
Pas disa seancash gjyqësore dhe marrjes së dhjetëra dëshmive, Gjykata për Krime të
Rënda tha dje se nuk është provuar që Suel Çela, i cili është gjykuar në mungesë, të ishte në "Audin" që përplasi makinën e Policisë. E vetmja provë që lidhte të pandehurin me makinën dhe ngjarjen ishte një cigare puro e gjetur aty, por në dëshmitë e punonjësve të Policisë, kjo provë nuk është gjetur e mbështetur, pasi ata nuk identifikuan shoferin dhe thanë se ka qenë vetëm një person në makinë, ndryshe nga sa ka pretenduar Prokuroria, që ka qenë Suel Çela dhe Enea Bekteshi. Një prej dëshmitarëve, gjatë shqyrtimit gjyqësor tha se ishte i sigurt që në makinë nuk ishte Suel Çela, pasi do ta njihte nëse do kishte qenë ai. "Shpalljen e pafajshëm të Suel Çelës për akuzën e ' Kundërshtimit të punonjësve të Policisë' dhe ' Goditjes për shkak të detyrës'. Pasi nuk janë gjetur prova që mbështesin pretendimin e Prokurorisë që i pandehuri ka qenë në drejtim të makinës ' Audi'. Materiali biologjik i gjetur në puron në makinë, vërteton faktin se i pandehuri ka përdorur këtë mjet, por jo se në atë moment ka qenë në drejtim. Gjithashtu, 4 nga punonjësit e Policisë të pyetur në Gjykatë kanë thënë se në makinë kanë parë vetëm një person dhe një prej dëshmitarëve ka mohuar, duke pohuar me siguri që ai nuk ishte Sueli, pasi do ta kishte njohur. Nuk janë sjellë në gjykim prova të tjera për vërtetimin e pretendimit se në ' Audi' ka qenë i pandehuri Suel Çela", tha Gjykata.
PRETENCA
Prokuroria për Krime të
Rënda ndryshoi gjatë leximit të pretencës akuzat për Suel Çelën, Enea Bekteshin dhe Kelment Xhaferrin, duke rrëzuar vrasjen e punonjësit të Policisë, mbetur në tentativë. Prokuroria tha se gjatë shqyrtimit nuk u gjet e provuar akuza e vrasjes së punonjësit të Policisë, por u gjet e provuar se Suel Çela dhe Enea Bekteshi kanë kundërshtuar punonjësit e Policisë dhe i kanë goditur për shkal të detyrës, e për këtë kërkoi dënimin e Çelës me 7 vite burg dhe Bekteshin me 6 vite. Edhe për Kelment Xhaferrin ra akuza e kundërshtimit të Policisë, por u kërkua shpallja e fajshme e tij për tri vepra të tjera: atë të armë mbajtjes pa leje, largim i të burgosurit dhe mbajtja e lëndëve plasëse, duke kërkuar dënimin me 6 vite burg. Gjatë seancës, Prokuroria pretendoi se është e provuar që në drejtim të "Audit" që përplasi makinën e Policisë ishte Suel Çela dhe pasagjer në ketë automjet ishte Enea Bekteshi.
REAGIMI I PD
Pas dhënies së vendimit për Suel Çelën, Partia Demokratike reagoi duke e konsideruar si mesazh "që kriminelët dhe ata që blejnë votat janë të paprekshëm". "Shpallja i pafajshëm i banditit të rrezikshëm të Elbasanit, Suel Çela, shërbëtor i pushtetit të Edi Ramës, provoi në mënyrë të përsëritur se me Edi Ramën në qeveri drejtësia nuk është e lirë të ndëshkojë krimin. Mesazhi që iu dha sot shqiptarëve është se kriminelët e pushtetit, ata që blejnë vota për karrigen e Edi Ramës, janë të paprekshëm! Kur kriminelët vjedhin zgjedhjet për Edi Ramën, kur bëjnë drogë me lejen e pushtetit të Edi Ramës, kur godasin Policinë dhe e çnderojnë atë me mbrojtjen e Edi Ramës, drejtësia është e pafuqishme të bëjë drejtësi", shkruhej në njoftim.