Policia dhe TIA, marrëveshje për sigurinë e aeroportit
Bashkëpunimi, pas dy grabitjeve spektakolare në pistën e avionëve
Pas dy grabitjeve spektakolare, ku u vodhën miliona euro në pistën e Aeroportit të Rinasit, më në fund u vendos që të nënshkruhet një marrëveshje për shtimin e masave të sigurisë mes TIA- s dhe Policisë së Shtetit.
Marrëveshja e nënshkruar tashmë, edhe pse e kërkuar nga Policia që prej qershorit të vitit 2016 kur ndodhi grabitja e parë, parashikon investime të reja dhe një bashkëpunim më të ngushtë mes Policisë dhe Aeroportit. Policia e Shtetit i ka kërkuar TIA- a të rrisë nivelin e sigurisë në rrethimin e aeroportit, ndërsa drejtori i përgjithshëm i Policisë, Ardi Veliu, u shpreh dje se duhet të rritet cilësia e kamerave të sigurisë dhe të qëndrojnë 24 orë ndezur. Pas grabitjes së ndodhur më 9 prill të këtij viti, Aeroporti "Nënë Tereza" u mor në ruajtje në perimetrin e tij të jashtëm nga forcat Ushtrisë dhe të Policisë së Shtetit.
DREJTORI I POLICISE
"Marrëveshja konsiston në rritjen e parametrave të sigurisë dhe detyrimet që duhet të ketë Tirana International Airport për sa u përket detyrimeve, që duhet të ketë ky institucion në lidhje me vendosjen e kamerave të sigurisë të një cilësie shumë të lartë, të një shërbimi 24 orë, ku të monitorohet edhe nga Policia e Shtetit. Njëkohësisht, edhe për kushtet e tjera të sigurisë për sa i përket rrethimit, mënyrës së protokollit të hyrje- daljeve, personeli që duhet të futet. Pra, janë një sërë normash, të cilat janë përcaktuar në këtë marrëveshje, që do të ndikojnë sigurisht në rritjen e parametrave të sigurisë, njëkohësisht edhe në forcimin e bashkëpunimit ndërmjet Policisë së Shtetit dhe TIA- s. Punonjësi i Policisë, mbi bazën e marrëveshjes është vendosur edhe për monitorimin e kamerave në sallën, e cila është aktualisht funksionale, por në marrëveshjen e re është përcaktuar që do të jetë një sallë edhe më e madhe me sistemet e fundit, ku pa dyshim që Policia e Shtetit do të jetë prezente në monitorim. Njëkohësisht, në marrëveshje është përcaktuar edhe rikonstruksioni dhe shtimi i ambienteve të Policisë. Në ligj përgjegjësia është e TIA- s, ne jemi partnerë", u shpreh dje drejtori i përgjithshëm i Policisë së Shtetit, Ardi Veliu.
MARREVESHJA
Sipas marrëveshjes që u nënshkrua dje mes drejtorit të përgjithshëm të Policisë,
Ardi Veliu, dhe Constantin von Alvensleben, drejtori i përgjithshëm ekzekutiv, TIA do të marrë përsipër edhe rikonstruksionin e Komisariatit të Policisë së Rinasit. Gjatë nënshkrimit të marrëveshjes ishin të pranishëm drejtori i përgjithshëm i operimeve, Volker Wendefeuer, drejtori i Departamentit për Kufirin dhe Migracionin në Policinë e Shtetit, Eduart
Merkaj, dhe shefi i Komisariatit të Policisë Kufitare Rinas, Përparim Demaj. Burimet thanë se në zbatim të kësaj marrëveshjeje, është rënë dakord që kamerat e sigurisë do të jenë të një rezolucioni mjaft të lartë dhe Policia do të ketë akses në monitorimin e tyre. Gjithashtu është rënë dakord edhe për shtimin e hapësirave të sallave të monitorimit e kontrollit.