Kërkoheshin nga Italia, ekstradohen 3 shqiptarë

Akuzohen për vrasje, grabitje e organizatë kriminale

TIRANE - Tre shtetas shqiptarë që kërkoheshin për krime të rënda nga drejtësia italiane, janë ekstraduar dje drejt vendit fqinj përmes Aeroportit të Rinasit. Ata ishin arrestuar më parë me qëllim ekstradimi dhe dje oficerët e Interpolit i shoqëruan drejt Italisë, ku ua dorëzuan autoriteteve vendëse. Personat që u ekstraduan dje janë nga Elbasani, Fieri dhe Kruja, ndërsa akuzohen për vrasje, grabitje dhe pjesëmarrje në organizatë kriminale, që trafikojnë lëndë narkotike. Policia e Shtetit njoftoi dje se, si rezultat i bashkëpunimit të Interpol Tirana me Interpol Roma, u bë ekstradimi drejt

Italisë i shtetasve: S. T., alias V. D., 50 vjeç, lindur në Elbasan, i shpallur në kërkim ndërkombëtar nga Interpol Roma, Itali, pasi autoritetet gjyqësore italiane, më datë 09.03.2017, kanë lëshuar ndaj këtij shtetasi urdhërarrest për kryerjen e veprës penale "Vrasja me paramendim", parashikuar nga Kodi Penal italian; K. E., alias K. S., 47 vjeç, lindur në Krujë, i shpallur në kërkim ndërkombëtar nga Interpol Roma, Itali, pasi Gjykata e Milanos, Itali, e ka dënuar këtë shtetas me 6 vite burg, për veprën penale "Vjedhja me armë", parashikuar nga Kodi Penal italian; R. K., 37 vjeç, lindur në Fier, i shpallur në kërkim ndërkombëtar nga Interpol Roma, Itali, pasi Gjykata e Brescias në Itali, më datë 19.01.2018, ka lëshuar ndaj këtij shtetasi urdhërarrest për veprën penale "Pjesëmarrja në organizatë kriminale, me qëllim trafikimin e lëndëve narkotike", parashikuar nga Kodi Penal italian. "Si rezultat i bashkëpunimit të Interpol Tirana me Interpol Roma, Itali, u bë i mundur arrestimi i tyre në Shqipëri duke u finalizuar më pas me ekstradimin e tyre drejt Italisë", tha dje zyrtarisht Policia.