“Rrjedh në këngë e ligjërime”, TKOB vendos veprat e Feim Ibrahimit në skenë
Bashkëshortja e mjeshtrit: Do të doja që sot këtu të ishte Feimi, por shorti më ra mua, dëshmitare e shumë ngjarjeve
Mund të thuhet shumë për artistët që kanë kontribuuar në atë kohë e që i kanë shërbyer me artin e tyre sistemit, por më mirë të vërtetat i dimë ne, që e kemi jetuar atë periudhë. Feim Ibrahimi pati kurajën të eksperimentojë në një realitet tmerrësisht të rrezikshëm
“E ardhmja mund të jetë pozitive vetëm nëse respekton të sotmen dhe të djeshmen”, thotë muzikanti Ermir Krantja, entuziast që do të dirigjojë në koncertin “Rrjedh në këngë e ligjërime”, kushtuar Feim Ibrahimit, një prej kolosëve të muzikës shqiptare e bashkëpunëtorit të tij.
Koncerti do të mbahet sot, në orën 19: 00, në Qendrën Kulturore të Katedrales Ortodokse dhe shënon një tjetër premtim të mbajtur të drejtoreshës së Teatrit Kombëtar të Operës dhe Baletit, Zana Çela, e cila në 22vjetorin e ndarjes nga jeta nderon kompozitorin me një ngjarje të tillë, që premton të jetë me vlera të larta artistike. E pranishme gjatë konferencës për mediat është edhe Vera Ibrahimi, bashkëshortja e kompozitorit. “Do të dëshiroja që këtu të sot të ishte ulur Feimi, por shorti më ra mua, dëshmitare e shumë ngjarjeve. Sot dua që të falënderoj të gjithë artistët për punën e bërë, duke mos ndalur te ngjarjet. Vitin e kaluar, pas një shfaqjeje në ‘ ArTurbina’, Zana më ndali edhe më tha: Vera, vitin që vjen do të kujtojmë Feimin. U emocionova atë natë, po aq e emocionuar jam edhe sot. I jam mirënjohëse që e mbajti premtimin”, thotë Vera me zërin që i dridhet. “Rrjedh në këngë e ligjërime” është në vazhdë të koncerteve, që TKOB mban prej 3 vitesh në nder të mjeshtërve që themeluan TKOB dhe që kanë dhënë një kontribut të çmuar në veprimtarinë artistike. “Ne kemi pas fatin të risjellim fondin e artë të krijimtarisë së mjeshtërve, që janë themeli i krijimtarisë muzikore në artin tonë. Feim Ibrahimi, me krijimtarinë e tij të pasur, i bëri sfidë mentalitetit të asaj kohe, tendencës së realizmit socialist. Jo vetëm që ishte ndër të parët kompozitorë që u arsimua në shkollën tonë, por krijimtaria e tij shënon një moment shumë interesant në krijimtarinë muzikore shqiptare. Ai i ka sjellë kombit shumë vepra në krijimtarinë vendëse, nga miniaturat e vogla për piano, te veprat skenike e simfonike, ku nuk mungojnë as vepra të muzikës akustike”, thotë drejtoresha e TKOB- së, Zana Çela. Siç kritika është shprehur për studentin e Tish Daijas, Ibrahimi ka mundur të thyejë kornizat e realizmit socialist me muzikën e krijuar. “Mund të thuhet shumë për artistët që kanë kontribuuar në atë kohë e që i kanë shërbyer me artin e tyre sistemit, por më mirë të vërtetat i dimë ne, që e kemi jetuar atë periudhë. Feim Ibrahimi pati kurajën të eksperimentojë në një realitet tmerrësisht të rrezikshëm”, thotë Krantja, i cili sjell në vëmendje bashkëpunimet e hershme me mjeshtrin e më pas me të bijën, pianisten Etrita Ibrahimi, që po ashtu do të interpretojë në piano gjatë këtij koncerti. Të tjerë artistë që do të risjellin veprat e kompozitorit janë: Armando Likaj, Vikena Kamenica, Nina Muho etj. Sipas Krantjas, ky koncert që dirigjohet prej tij plotëson veprën e Feim Ibrahimit, imazhin e tij dhe njëherazi shërben edhe për të dhënë një mesazh për të rinjtë. “Ju që sot keni liri veprimi dhe fjale duhet që të gërmoni, duhet të dini se çfarë është bërë në të kaluarën. Ibrahimi ishte vetëm 20 vjeç kur e nisi rrugëtimin e tij dhe e përmbushi qëllimin, sepse një njeri që ka ide, synime, duhet të shikojë përpara, pavarësisht pengesave”, thotë muzikanti, duke evidentuar edhe mungesën e kritikës, e cila do të evidentonte vlerat e vërteta të artit e kulturës në vend.