Tërmeti, pezullohet puna e gjykatave në 3 qarqe
Pezullimi do vazhdojë deri në vlerësimin e largimit të rrezikut
Këshilli i Lartë Gjyqësor bëri të ditur dje se puna e gjykatave në tri qarqe të prekura nga tërmeti do të pezullohej pa afat. Sipas vendimit të KLGJ- së, puna do të vazhdojë vetëm pasi të vlerësohen dëmet dhe të rikonstruktohen. Kujtojmë se tërmeti që u ndje pothuajse në të gjithë Shqipërinë, shkaktoi dëme të mëdha njerëzore, por edhe në ndërtesa, ku dhjetëra banesa janë prishur totalisht e shumë të tjera janë shpallur të pabanueshme. Ndër godinat e prekura nga tërmeti janë edhe ato të gjykatave, por edhe të prokurorive. Më herët, KLGJ kishte pezulluar punën përkohësisht deri në marrjen e një vendimi tjetër dhe këtë të hënë njoftoi se puna do të pezullohej vetëm në tri qarqe. "Këshilli i Lartë Gjyqësor bazuar në nenet, 147/ 1, 147/ a, pika 1 germa ' d' të Kushtetutës së Republikës së Shqipërisë, në nenin 61 të ligjit nr. 115/ 2019 ' Për organet e qeverisjes së sistemit të drejtësisë', në ligjin nr. 45/ 2019 ' Për mbrojtjen civile', në Vendimin e Këshillit të Ministrave nr. 750, datë 27.11.2019 ' Për shpalljen e gjendjes së fatkeqësisë natyrore në qarqet Durrës dhe Tiranë', të ndryshuar. Pezullimin e veprimtarisë dhe shërbimeve gjyqësore në gjykatat, të cilat ushtrojnë veprimtarinë e tyre në qarqet Durrës, Tiranë dhe Lezhë, për shkak të gjendjes së fatkeqësisë natyrore të ndodhur nga tërmeti i datës 26.11.2019", shkruhej në vendimin e KLGJ. Më tej, përcaktohet se nga ky pezullim përjashtohen shërbimet gjyqësore të ngutshme dhe që mund të kryhen edhe në ambiente të tjera që nuk përbëjnë rrezik. Kryetarët e gjykatave do të merren me masat për zbatimin e këtij vendimi dhe puna do të nisë vetëm pasi autoritetet përgjegjëse të bëjnë vlerësimin e kushteve të riskut dhe të eliminohet çdo rrezik i mundshëm, që mund të prekë jetët e njerëzve. "Përjashtohen nga efektet e këtij pezullimi veprimtaria dhe shërbimet gjyqësore, që lidhen me çështje me natyrë të ngutshme, shqyrtimi i të cilave mund të zhvillohet edhe në ambiente të tjera jashtë gjykatës, të cilat ofrojnë siguri. Kohëzgjatja e pezullimit, parashikuar në pikën 1 të këtij vendimi, të jetë deri në momentin kur autoritetet përgjegjëse të bëjnë vlerësimin e kushteve ekzistuese të riskut të ambienteve të gjykatës dhe të garantohet eliminimi i çdo rreziku të mundshëm që mund çojë në dëmtim të jetëve njerëzore ashtu edhe të pronës. Kryetarët e gjykatave ngarkohen të marrin të gjithë masat për zbatimin e këtij vendimi. Ky vendim hyn në fuqi menjëherë me publikimin e tij në faqen zyrtare të internetit të Këshillit të Lartë Gjyqësor", shkruhet në vendim.