Kurti e Mustafa pa pakt qeverisjeje, ja pse grinden
Presidenti apo ministritë, çfarë s’po bind fituesit në Kosovë
Sot pritej shpallja e marrëveshjes së bashkëqeverisjes mes Lëvizjes vetëvendosje dhe Lidhjes Demokratike të Kosovës, por Albin Kurti dhe Isa Mustafa kanë pohuar se kanë ende mosmarrëveshje.
Takimi mes tyre, i cili nga vetë forcat politike përkatëse ishte sinjalizuar si takimi i marrëveshjes, përfundoi pa sukses. Kurti deklaroi se do të vazhdojë të qëndrojë në kontakt me Mustafën. “Kur ta kemi marrëveshjen e plotë, do të mund ta shpalosim gjerë e gjatë... dhe unë jam në kontakt të drejtpërdrejtë me kryetarin e LDK- së që ta përcaktojmë takimin e radhës...”, shtoi ai. Mustafa, pas takimit me Kurtin, tha se “Patëm një bisedë mjaft përmbajtjesorë... sot nuk ka marrëveshje për koalicion ka marrëveshje që të punojmë e të hulumtojmë rrugë që të përafrohemi qëndrimet tona”, tha ai. Sipas “Express”, burime nga LDK kanë bërë me dije se Vetëvendosja i është përgjigjur kërkesës së LDK- së për postin e Presidentit me një kundërkërkesë: do 7 ministri për vete, 3 është e gatshme t’ia japë asaj bashkë me zotimin se në të ardhmen do ta kenë edhe postin e Presidentit. LDK- ja është kundërpërgjigjur që ndarja e ministrive të bëhet 5 me 5, pasi posti i Presidentit është vetëm zotim. Po ashtu, posti i Krye parlamentarit dot’ i takojë Lidhjes Demokratike të Kosovës. Kurti, që ishte shumë optimist që do të arrihej koalicioni, nuk tregoi pse nuk u morën vesh të hënën. Por, sipas burimeve të “Express”, dy partitë janë marrë vesh për 12 ministri. Dy u takojnë minoriteteve e 10 janë në duart e dy partive që bashkë kanë 57 deputetë. Nga LVV thanë se LDK- ja nisi me kërkesë për ta marrë Ministrinë e Punëve të Brendshme. Kjo ministri ka qenë një nga bazat e fushatës së Vetëvendosjes. LDK më herët e ka udhëhequr këtë dikaster, ndërsa LVV e kërkon kontrollin e tij për të eliminuar kapjen e shtetit, që synojnë ta arrijnë duke udhëhequr Ministrinë e Punëve të Brendshme.