Atentat mafioz ndaj dy vëllezërve, kush është viktima dhe i plagosuri i punësuar në bashki
DYSHIMET PER PRISHJE PAZARESH. NJERI NGA VELLEZERIT I ARRESTUAR PER DROGE NE 2011
Një atentat ndaj dy vëllezërve ka tronditur mbrëmjen e së mërkurës qytetin e Tepelenës. Viktimë ka mbetur Artur Bresha, 47 vjeç, ndërsa u plagos në këmbë i vëllai, Artan Bresha, 43 vjeç. Ky i fundit ndodhet në spital jashtë rrezikut për jetën.
47- vjeçari dhe i vëllai i tij u qëlluan në rrethana ende të paqarta. Artani u gjet i vrarë me armë zjarri në dalje të qytetit të Tepelenës. Ai punonte si roje në By pass- in e Tepelenës, aty ku u gjet edhe i vrarë. Prej disa vitesh, ai ka qenë emigrant, ndërsa pas kthimit punonte si roje objekti. Pas ekzekutimit të vëllait të madh të familjes Bresha, autorët, që ende nuk janë identifikuar, janë drejtuar drejt dyqanit në pronësi të familjes, ku ndodhej 43vjeçari Artan Bresha, duke qëlluar dhe mbi të me breshëri automatiku. Ai ka marrë një plumb në kofshë dhe iu nënshtrua ndërhyrjes kirurgjikale në Spitalin Rajonal “Omer Nishani” të Gjirokastrës. Shkak për atentatin dyshohet të jetë bërë një konflikt për prishjen e pazareve të drogës. Policia ka ngritur një grup të posaçëm hetimor për zbardhjen e rrethanave të ngjarjes, identifikimin dhe kapjen e autorëve. Në ndihmë të tyre u bashkua edhe një grup specialistësh të Departamentit të Policisë Kriminale në Policinë e Shtetit. Policia ngriti pika kontrolli në akset rrugore nacionale dhe ato rurale që lidhen me qytetin e Tepelenës, ndërsa forca të shumta të Policisë së Tepelenës dhe Gjirokastrës bënë krehjen e zonës, me qëllim kapjen e autorëve. I plagosuri Artan Bresha apo “Bostani”, siç e thërrasin shkurt miqtë e tij, është punonjës shërbimesh në Bashkinë Tepelenë dhe është një emër i njohur për Policinë. Në 2011– ën, ai u ndalua nga Policia e Gjirokastrës me 820 kg kanabis në “Qafë të Muzinës”, të Sarandës. Bresha ishte i vetmi i arrestuar, ndërsa tre persona të tjerë arritën të largoheshin duke i shpëtuar prangosjes. Ndalimi dhe bllokimi i lëndës narkotike u finalizua në rrugën kombëtare GjirokastërKakavijë, pranë fshatit Goranxi. Gjatë aksionit të Policisë u bllokua dhe një automjet tjetër, ‘ Touareg’, me targa TR 8194 R.