Rama kërkon ndihma nga krerët e NATO- s, KE: Konferencë donatorësh
"Përjetë mirënjohje, profesionalizëm i jashtëzakonshëm"
Presidenti i Republikës, Ilir Meta, vlerësoi dje Forcën e Sigurisë së Kosovës, që mbërriti e para në Durrës dhe Thumanë pak orë pas goditjes nga tërmeti tragjik i 26 nëntorit. Gjatë ceremonisë së vlerësimit të Forcës së Sigurisë së Kosovës, Presidenti Meta i ka falënderuar për ndihmën që i dhanë Shqipërisë për tërmetin e 26 nëntorit. Meta tha se Forca e Sigurisë së Kosovës u paraqit në vijën e parë të betejës "mes jetës dhe vdekjes". Kreu i shtetit tha se trupat ushtarake të Kosovës meritojnë emrin "shpëtimtarë". "Nuk ka emër më të mirë dhe vlerësim më të mirë se shpëtimtarë për të gjithë ju, do të donim ta kishim festuar 28 nëntorin me gjithë madhështinë që ka kjo ditë e bekuar, që ia kemi borxh Ismail Qemalit dhe Isa Boletinit, ta festonim së bashku në Vlorë, Tiranë, Prishtinë e Prizren, por ja që nuk ishte e thënë. Por edhe ky 28 nëntor që sapo lamë, na gjeti të përbashkuar si asnjëherë tjetër në historinë tonë, të gjithë shqiptarët kudo ku ishim e jemi për t'u përballur me pasojat katastrofike të tërmetit. Në këtë betejë të vërtetë, tashmë me një bilanc të rëndë lufte, Shqipëria nuk mbeti e vetme, vendet mike dhe partnere na u gjendën pranë, por Kosova ishte e para që u ndodh atje menjëherë në luftën për të shpëtuar jetën e çdo shqiptari, ekipet tuaja ishin atje, në radhë të parë njerëzisht, vëllazërisht e shqiptarisht, duke rrezikuar jetën. Populli shqiptar, përjetë mirënjohje forcave të sigurisë së Kosovës, ekipit mjekësor, policor, njësisë së komunikimit dhe çdo ekipi që ishte atje e tregoi gatishmëri të jashtëzakonshme", theksoi Meta. Me një gjest të pazakontë, Presidenti Meta falënderoi edhe qenin hero të FSK- së, i cili shpëtoi disa jetë pas tërmetit të fortë të 26 nëntorit. Kreu i shtetit është përkulur dhe e ka puthur qenin hero. "Në mirënjohje të thellë, për sakrificat dhe solidaritetin vëllazëror, gatishmërinë e pashoq dhe profesionalizmin e jashtëzakonshëm të treguar që në momentet e para pas tërmetit të 26 nëntorit, pata nderin të vlerësoja sot në Prishtinë, Forcat e Sigurisë, Njësinë Operacionale të Policisë dhe të gjitha ekipet e kërkimit dhe shpëtimit të Kosovës", shkruan kreu i shtetit në FB. Po dje,
Presidenti Meta ishte në Gjilan, në familjen e dy vëllezërve Abazi, që humbën jetën në rrënojat e një hoteli në Durrës. Presidenti Meta konfirmon se do të jetë gjithmonë pranë familjes Abazi, për t'i ardhur në ndihmë. "Sot në Gjilan, për t'u shprehur ngushëllimet dhe për të ndarë dhimbjen me familjen Abazi. Thellësisht i prekur nga humbja e jetës së vëllezërve Shemsedin dhe Isa Abazi nga tërmeti që goditi Shqipërinë në 26 nëntor. Do të jemi gjithmonë pranë familjes Abazi!", shkruan Presidenti. Vëllezërit Abazi ishin transferuar në Durrës për të punuar dhe për t'u siguruar një jetesë më të mirë fëmijëve të tyre. Ata lanë pas 6 jetimë, ndërsa familja ndodhet në kushte të vështira ekonomike. Në Prizren, kreu i shtetit u takua dhe me qytetarët shqiptarë të prekur nga tërmeti, që janë strehuar në kapin e Inovacionit. Presidenti Meta falënderoi Komunën e Prizrenit dhe kryetarin e saj, Haskuka, për përkujdesjen e ngrohtë dhe vëllazërore.