KE akordon 15 milionë euro për pasojat e tërmetit

Ursula von der Leyen: Konferencë ndërkombëtare donatorësh nga BE

Presidentja e Komisionit Europian, Ursula von der Leyen, tha dje se BE ndodhet në krah të popullit shqiptar, si nga ana njerëzore, ashtu edhe në veprime. Der Leyen tha se sapo kishte folur me Kryeministrin shqiptar, Edi Rama, i cili i kishte treguar në lidhje me situatën e vështirë pas tërmetit. "Sapo fola me Kryeministrin Edi Rama dhe e informova që Komisioni Europian zotohet të japë 15 milionë euro për mbështetjen e menjëhershme të popullit shqiptar. Për më tepër, BE do të organizojë një konferencë donatorësh për të ndihmuar Shqipërinë me rindërtimin", theksoi ajo. Ajo u shpreh se populli shqiptar duhet të dijë se Bashkimi Europian është në krah të tij. "Kam respekt të madh për popullin shqiptar, i cili qëndroi i qetë, pavarësisht rrethanave. Dua që ata ta dinë se BE ndodhet në krah të tyre me dhembshuri dhe me veprime", theksoi presidentja e Komisionit Europian, Ursula von der Leyen. Ajo njoftoi se komisioneri europian për Menaxhimin e Krizave, diplomati slloven, Janez Lenarcic, do të jetë në Shqipëri. "I kam kërkuar të më mbajë tërësisht të informuar për situatën", shprehet presidentja e Komisionit Europian. Komisioni i BE- së ka ndihmuar në mobilizimin e ekipeve të kërkimit dhe shpëtimit, një staf prej më shumë se 200 personash nga Italia, Greqia dhe Rumania. "Ne kemi dërguar me dhjetëra shtretër, gjeneratorë, çanta gjumi, batanije dhe sende për nevoja urgjente nga Belgjika, Rumania, Sllovakia", tha më herë ajo. Kryeministri izraelit, Netanyahu, është shprehur se gjendet pranë shqiptarëve. Gazeta "The Jerusalem Post" citon Kryeministrin izraelit: "Ne e dimë se Shqipëria është një mik i mirë i Izraelit. Ne kurrë nuk i harrojmë miqtë tanë". Një ekip izraelit prej 10 vetash mbërriti në Tiranë për të ndihmuar në përpjekjet e rindërtimit pas tërmetit shkatërrues që goditi vendin javën e kaluar. "Ekipi i dërguar është një dëshmi për marrëdhëniet e shkëlqyera midis vendeve", tha ministri i Jashtëm izraelit, Katz. Të udhëhequr nga koloneli Golan Vach, drejtues i njësisë së kërkimit dhe shpëtimit të Ushtrisë Izraelite ( IDF), delegacioni përfshin oficerë dhe inxhinierë që do të ekzaminojnë ndërtesat në zonë për të përcaktuar nëse ato janë të pasigurta. Ata gjithashtu do t'i ofrojnë qeverisë ndihmë logjistike në trajtimin e të plagosurve. Sipas Ministrisë së Jashtme, qeveria shqiptare ka kërkuar që delegacioni të vizitojë vendet e dëmtuara nga tërmeti në mënyrë që të japin këshilla se si të parandalohet shembja e tyre. Delegacioni solli me vete edhe ndihmë humanitare, përfshirë çadra për ata që mbeten pa shtëpi. Ambasadori i Izraelit në Sh

MILIONË

euro zotohet të japë Komisioni Europian për mbështetjen e menjëhershme të popullit shqiptar. Për më tepër, BE do të organizojë një konferencë donatorësh për të ndihmuar Shqipërinë me rindërtimin qipëri, Noah Gal Gendler, po koordinon ndihmën e Izraelit me autoritetet qeveritare. Izraeli dhe Shqipëria vendosën marrëdhënie diplomatike në 1991 kur vendi i dikur i izoluar i Ballkanit doli nga prapa "Perdes së Hekurt". Sot, Shqipëria konsiderohet një mik i fortë i Izraelit në Ballkan dhe shpesh e përkrah atë në votimet kryesore ndërkombëtare. Kryeministri Benjamin Netanyahu përshëndeti marrëdhëniet midis dy vendeve kur Kryeministri i atëhershëm shqiptar, Edi Rama, vizitoi Jerusalemin katër vjet më parë.