Arrestohet i riu, bastisi shtëpinë e kushëririt
Ngjarja para një muaji në Kamzë, u vodhën 2 milionë lekë
Një 25- vjeçar me dy kushërinjtë e tij adoleshentë kanë bashkëpunuar për t’i vjedhur shtëpinë një tjetër të afërmi në zonën e Kamzës në Tiranë. Ngjarja ka ndodhur para një muaji, por është zbuluar pas hetimeve proaktive, që kanë përdorur specialistët e Hetimit të Krimeve në Komisariatin nr. 5. Ata kishin arritur të merrnin 2 milionë lekë të rinj në banesën e kushëririt të tyre, para që i kishin shpenzuar në bashkëpunim me njëri- tjetrin. Në përfundim të veprimeve hetimore, oficerët e Komisariatit nr. 5 arritën të dokumentonin ngjarjen, me prova ligjore dhe vunë në pranga njërin nga të dyshuarit. Ndërsa dy të tjerët, të cilët sipas burimeve kishin pasur rol informues, por edhe për shkak të moshës së mitur, u vendos që të procedohen në gjendje të lirë. Policia tha dje se ka arrestuar 25- vjeçarin me inicialet A. Q., ndërsa ka proceduar në gjendje të lirë dy kushërinjtë e tij, shtetasin G. Q., 15 vjeç, dhe shtetasen A. Q., 14 vjeçe, banuese në Kamzë. Ngjarja për të cilën ata akuzohen, ka ndodhur më 6 nëntor të këtij viti, në shtëpinë e shtetasit me iniciale Xh. Q., në Kamzë, ku dyshohet se kanë vjedhur 2 milionë lekë të rinj. Tre të dyshuarit, sipas burimeve, kanë pasur informacion se në shtëpinë e të afërmit të tyre kishte një shumë të madhe parash dhe kanë organizuar planin për të hyrë në shtëpi, në kohën që ai nuk ndodhej brenda. “Finalizohet operacioni policor i koduar ‘ Cousins’, i ndjekur me metoda proaktive, për zbardhjen e vjedhjes të ndodhur më datë 6 nëntor 2019, ku në banesën e shtetasit Xh. Q., u vodhën 2 milionë lekë të rinj. Vihet në pranga një shtetas dhe dy të tjerë procedohen në gjendje të lirë. Shërbimet e Komisariatit të Policisë nr. 5 finalizuan me metoda proaktive operacionin policor të koduar ‘ Cousins’, në kuadër të të cilit u arrestua shtetasi A. Q., 25 vjeç, banues në Kamzë ( kushëri i pronarit të banesës së vjedhur, shtetasit Xh. Q.,), si dhe u proceduan në gjendje të lirë shtetasit G. Q., 15 vjeç dhe A. Q., 14 vjeçe, banuese në Kamzë. Nga tërësia e veprimeve hetimore dhe procedurale të kryera ka rezultuar se në datë 6 nëntor 2019, këta tre shtetas në bashkëpunim me njëri- tjetrin kanë vjedhur banesën e shtetasit Xh. Q., ku kanë marrë 2 milionë lekë të rinj. Materialet iu referuan Prokurorisë së Rrethit Gjyqësor Tiranë për veprën penale ‘ Vjedhje e kryer në bashkëpunim’”, tha dje zyrtarisht Policia e Tiranës.