Sejko: Kreditë me probleme u ulën, bankat kanë kapital
“Është ruajtur stabiliteti monetar, makroekonomik e financiar”
Guvernatori i Bankës së Shqipërisë, Gent Sejko, i cilësoi të suksesshme politikat e ndjekura nga institucioni që ai drejton. Sipas tij, ato kanë shërbyer në ruajtjen e stabilitetit monetar makroekonomik dhe financiar.
SEJKO Gjatë fjalës së mbajtur në Seminarin e 13- të të Kërkimeve Ekonomike në Europën Juglindore, Sejko tha se sektori bankar ka qenë i qëndrueshëm. Provë për këtë janë reduktimi i kredive me probleme nga njëra anë dhe rritja e kreditimit në anën tjetër. “Bazuar në analiza të kujdesshme dhe rigoroze, politikat tona kanë qenë të suksesshme në ruajtjen e stabilitetit monetar, makroekonomik dhe financiar. Me gjithë vështirësitë e hasura, ekonomia jonë ka regjistruar norma pozitive rritjeje dhe sistemi ynë bankar ka qenë i qëndrueshëm. Sektori bankar është i mirëkapitalizuar dhe fitimprurës, kreditë me probleme janë ulur dhe bankat po vazhdojnë ta mbështesin aktivitetin ekonomik me kredi, ndërkohë që menaxhojnë edhe goditjet e mundshme që burojnë nga sektori i jashtëm i ekonomisë”, tha Guvernatori Sejko.
SEMINARI Seminari i organizuar nga Banka e Shqipërisë për të 13tin vit radhazi, synon të ofrojë një forum për diskutimin e punëve kërkimore më të fundit mbi çështje ekonomike dhe financiare, të nxisë shkëmbimin e pikëpamjeve midis kërkuesve të Bankës së Shqipërisë, bankierëve qendrorë, komunitetit akademik, studiuesve dhe politikëbërësve në rajon dhe më gjerë. Guvernatori shtoi se përveç temave tradicionale, këtë vit do të diskutohen edhe kërkime në fusha të reja dhe të rëndësishme, siç janë: dixhitalizimi i shërbimeve financiare, reformat strukturore, ekonomiksi i shërbimit shëndetësor dhe ndikimet e tij për objektivat e bankës qendrore dhe mirëqenien kombëtare. Zhvillimet teknologjike si dhe ato demografike paraqesin disa nga sfidat më të rëndësishme për shoqëritë dhe institucionet tona. Prandaj, është e rëndësishme që këto dukuri të studiohen dhe të kuptohen saktë. Gjithashtu, duke marrë shkas nga ndodhitë e fundit, Guvernatori nënvizoi se në të ardhmen fusha kërkimore e Bankës së Shqipërisë do të thellohet me tej në studimin e impakteve të mundshme, që mund të ketë në stabilitetin financiar dhe ekonominë në përgjithësi, goditjet e shkaktuara nga fatkeqësitë natyrore. Nga ana e tij, Ambasadori i Zvicrës në Shqipëri, Adrian Maître, vlerësoi punën e Bankës së Shqipërisë si dhe bashkëpunimin me Sekretariatin Zviceran të Shtetit për Çështjet Ekonomike ( SECO) dhe Programin e Asistencës Dypalëshe për ngritjen e kapaciteteve të bankave qendrore ( BÇ) për mbështetjen e veprimtarisë kërkimore në Bankën e
Shqipërisë. Gjatë fjalës së tij, ambasadori vuri në dukje se bashkëpunimi i deritanishëm me Bankën e Shqipërisë ka qenë mjaft frytdhënës dhe do të vazhdojë edhe në të ardhmen, me qëllim përmirësimin e vazhdueshëm të metodologjive dhe produkteve të kërkimit shkencor.