PD, kërkesë qeverisë për Thumanën: Kush i vlerësoi?
“A u verifikuan dy pallatet në Thumanë pas tërmetit të 21 shtatorit”?
Partia Demokratike i ka dërguar një letër zyrtare qeverisë, ku i kërkon llogari për pallatet e shembura në qytezën e Thumanës, ku pati 24 viktima nga tërmeti i 26 nëntorit.
Letra e PD- së e firmosur nga sekretari i përgjithshëm i kësaj partie, Gazment Bardhi, kërkon informacione në lidhje me gjendjen e këtyre godinave pas tërmetit të 21 shtatorit, nëse atyre i ishte bërë inspektim dhe nëse po, cili ka qenë përfundimi që kishin prodhuar ekspertët. Në letrën e PD- së, theksohet se ky informacion kërkohet pas heshtjes së qeverisë në lidhje me këtë çështje. "Pas heshtjes së qeverisë për pyetjet tona publike, sekretari i përgjithshëm i PD- së, Gazment Bardhi, u drejtohet me kërkesë zyrtare për informacion qeverisë dhe Bashkisë Krujë për 5 çështjet e mëposhtme: 1. Pas tërmetit të datës 21 shtator 2019, a ka kërkuar zyrtarisht dhe a ka kryer Bashkia Krujë verifikimin e sigurisë dhe gjendjes së dy pallateve të shkatërruara në Thumanë nga tërmeti i datës 26 nëntor 2019? Nëse po, ju lutem na vini në dispozicion dokumentin zyrtar që e provon këtë. A është informuar ose raportuar pranë Komitetit Ndërministror të Emergjencave Civile ( KNEC) për gjendjen e këtyre pallateve? 2. A u verifikuan dy pallatet në Thumanë pas tërmetit të 21 shtatorit? Nëse po, kush janë ekspertët që u angazhuan dhe çfarë vlerësimi bënë ata? Lutemi një kopje të aktit të konstatimit/ verifikimit të hartuar dhe nënshkruar prej tyre. 3. A u lajmëruan banorët për gjetjet e ekspertimit/ verifikimit? 4. Nëse godinat ishin vlerësuar si të rrezikshme, çfarë masash u morën për strehimin e banorëve dhe ndalimin e hyrjes në ato banesa? 5. Kush lejoi futjen e banorëve në pallatet e shembura në 26 nëntor 2019 dhe mbi çfarë baze u bë kjo?", thuhet në letrën e PD- së. Numri dy i PD- së më herët, dje, në një reagim në "Facebook" akuzoi qeverinë se për ato godina që u shembën nga tërmeti i 26 nëntorit, nuk kishte marrë asnjë masë edhe pse ato ishin dëmtuar nga lëkundja e 21 shtatorit.
BASHA Kryetari i Partisë Demokratike, Lulzim Basha, ka vijuar takimet e tij me banorët e prekur nga tërmeti. Dje, lideri demokrat ishte në qytetet e Krujës, Durrësit dhe Lezhës, nga ku ka parë nga afër gjendjen e banorëve, të cilëve iu janë dëmtuar shtëpitë nga tërmeti i 26 nëntorit. Kreu i PD- së është takuar edhe me disa pjesëtarë të forcave të Ushtrisë shqiptare, që morën pjesë në operacionet e kërkim- shpëtimit në ditët e para pas tërmetit. Në këto takime, Basha përsëriti kërkesën e tij që fondi prej 150 milionë eurosh, që është planifikuar për koncesionet, t'u jepet banorëve të prekur nga tërmeti. Lideri i opozitës ka përsëritur gjithashtu kërkesën e tij për angazhimin e specialistëve në procesin e verifikimit të dëmeve në ndërtesat e prekura. "Dhjetëra familje me fëmijë të vegjël në Rrëzë të Krujës kanë mbetur krejt të vetëm në përballimin e pasojave që u la tërmeti i javës së kaluar. Për fat të mirë, në këtë fshat nuk pati asnjë viktimë, por pothuajse të gjitha shtëpitë janë të pabanueshme. Asnjë masë nuk është marrë për ta. Asnjë ndihmë, asnjë çadër apo ushqim nuk u ka ardhur nga shteti. Duhen hapa konkretë dhe zgjidhje emergjente, sepse gjendja e tyre po rëndohet edhe nga moti i ftohtë. Pa humbur kohë, 150 milionë dollarët që janë ndarë për 10 oligarkë duhet të kalojnë për banorët e dëmtuar nga tërmeti, që sot janë në qiell të hapur. Qeveria duhet të nisë lëvrimin e fondeve për t'u ardhur në ndihmë banorëve në zonat rurale për të cilët është e pamundur zhvendosja, në mënyrë që të nisin riparimin apo rindërtimin e shtëpive të shkatërruara", shkruan Basha në rrjetet sociale.