ONM kërkon ankim ndaj Besim Hajdarmatajt
Disa denoncime të publikut mund t'i hapin punë prokurorit
Operacioni Ndërkombëtar i Monitorimit i rekomandon Komisionerëve Publikë ankimin e vendimit ndaj prokurorit të Krimeve të Rënda, Besim Hajdarmataj. IKP- ja njoftoi dje për rekomandimin e ONM dhe shton se do të merret parasysh gjatë shqyrtimit të vendimit të zbardhur për Hajdaramtajn. "Në datën 16.10.2019, në përfundim të seancës dëgjimore përkatëse, Komisioni i Pavarur i Kualifikimit vendosi konfirmimin në detyrë të subjektit të rivlerësimit, z. Besim Hajdarmataj, me detyrë prokuror pranë Prokurorisë së Gjykatës së Shkallës së Parë për Krime të Rënda, Tiranë. Në datën 4.12.2019, Operacioni Ndërkombëtar i Monitorimit u ka paraqitur Komisionerëve Publikë rekomandimin për të ankimuar në Kolegjin e Posaçëm të Apelimit vendimin e Komisionit të Pavarur të Kualifikimit, për konfirmimin në detyrë të z. Besim Hajdarmataj. Komisionerët
Publikë, pasi të njoftohen me shkrim për vendimin nga Komisioni i Pavarur i Kualifikimit, do ta shqyrtojnë atë krahas rekomandimit të Operacionit Ndërkombëtar të Monitorimit", njoftoi KP- ja.
REKOMANDIMI Sipas rekomandimit të ONM, duhet të hetohen dhe shqyrtohen më thellë 4 denoncime, ku ngrihen pretendime se në katër çështje të hetuara në Prokurorinë për Krime të Rënda, në atë të Kurbinit dhe Durrësit, ka pasur mangësi. "Denoncuesit i referohen, ndër të tjera, pesë rasteve parësore, të hetuara përkatësisht nga Prokuroria e Krimeve të Rënda, nga Prokuroria e Kurbinit dhe nga Prokuroria e Durrësit kur subjekti i rivlerësimit ishte në krye. Ankuesit pretendojnë se çështjet janë keqmenaxhuar me dashje në këmbim të përfitimeve financiare. Ndërsa pretendimi për ryshfet mbetet për t'u provuar, është fakt se secila prej rasteve karakterizohet nga mangësi të konsiderueshme", shkruhet në rekomandim. Dosjet për të cilat ONM- ja u referohet, kanë të bëjnë me një hetim të mbyllur të vitit 2010, kur Hajdarmataj ka qenë në krye të Prokurorisë së Kurbinit për 4 çështje të trafikut të hashashit, të hetuara në Prokurorinë e Krimeve të Rënda, si dhe vendimin e moskompetencës për hetimin e një gjyqtareje të Tiranës. Më tej, Operacioni Ndërkombëtar i Monitorimit ngre dyshime mbi të ardhurat e vëllait të Hajdarmatajt të dërguara në Shqipëri nga Anglia. Edhe vendbanimi i prokurorit është parë me dyshim nga ONM- ja.