Kostandin Xhuvanit i shtohen 4 vite burg për kanosje
Dënohet dhe ish- infermieri i Spitalit Psikiatrik në Elbasan, që e shpëtoi nga hetimi. E vërteta u zbulua pas vrasjeve në Tiranë
Kostandin Xhuvanit, i dënuar për vrasje të katërfishtë, do t'i shtohen dhe katër vite të tjera burg. Kjo, pasi Gjykata e Gjirokastrës e ka dënuar Xhuvanin për akuzën e "Mbajtjes pa leje të armëve".
Vendimi për dënimin e djalit të ish- deputetes së Partisë Socialiste, Luiza Xhuvanit, është marrë disa ditë më parë nga tre gjyqtarë të Gjirokastrës, të cilët pasi analizuan provat e dërguara në gjyq nga prokurori Julian Çafka, deklaruan fajtorë dhe dënuan Xhuvanin dhe Budanin. Këta të fundit kanë ankimuar vendimin në Gjykatën e Apelit Gjirokastër, ku kërkojnë të shpallen të pafajshëm. Bashkë me Xhuvanin është dënuar dhe ishinfermieri i Spitalit Psikiatrik në Elbasan, Kujtim Budani, i akuzuar për "Falsifikim të dokumenteve", i cili ka marrë një dënim prej 18 muaj heqje lirie. Kostandin Xhuvani është dënuar me 35 vite burgim për vrasjen e katër personave më 4 nëntor 2014. Ishte pikërisht arma e përdorur në këtë krim që çoi në zbulimin e ngjarjes së ndodhur disa muaj më parë në Gjirokastër. Xhuvani u denoncua se në prill të 2014- ës kishte kanosur me armë një person, duke qëlluar në ajër. Por, i riu i shpëtoi drejtësisë duke thënë se ditën e ngjarjes ka qenë i shtruar në spital. Dosja penale është hapur dhe mbyllur disa herë nga Prokuroria, por çështja vijonte të ishte nën hetim. Verifikimet e fundit arritën të zbardhin kronologjinë e krimit të ndodhur në Gjirokastër. Kryerja e ekspertizës balistike të armës që përdori Xhuvani në masakrën e katërfishtë në Tiranë, me tri gëzhojat e sekuestruara në ngjarjen e Gjirokastrës, rezultoi se ishte e njëjtë me armën që u përdor në ngjarjen e 25 prillit të 2014- ës, në Gjirokastër, ku ndodhi një konflikt me armë, pa të lënduar. Gjatë marrjes në pyetje, Kostandin Xhuvani deklaroi se nuk ishte autor i kësaj ngjarjeje dhe ditën e 24 prillit ai ndodhej i shtruar në Spitalin Psikiatrik të Elbasanit pas konsumimit të një sasie alkooli. Alibia e tij konfirmohej edhe nga regjistrimi në librin e konsultave të këtij spitali. Gjatë hetimeve, Prokuroria zbuloi falsifikim në librin e konsultave në Spitalin Psikiatrik dhe ngriti akuzën ndaj ish- infermierit të Spitalit Psikiatrik, Kujtim Budanit.