Çako: Vullneti human prevalon mbi teknologjinë

"Përballimi i fatkeqësive të tilla kërkon kapacitete dhe mbështetje"

Kreu i emergjencave Civile, Haki Çako, në një intervistë për emisionin "Kjo Javë" në "News 24", ka folur për situatën e krijuar nga tërmeti i 26 nëntorit dhe se si ajo u përballua nga ekipet e zjarrfikësve. Sipas Çakos, është e padrejtë që të bëhen akuza për pajisjet e kësaj strukture, pikërisht nga njerëz që në këto dekada kanë pasur në dorë mundësinë për ta bërë diçka për të. Sipas Çakos, një ngjarje aq e rëndë kërkon kapacitete të mëdha, por sado që ato të jenë, sërish kërkohet mbështetje nga vende me përvojë më të madhe. "Mos durimi apo padurimi i qytetarëve është i ligjshëm, për shkak të kushteve apo humbjes së banesave, por kurrsesi nuk është i ligjshëm interpretimi apo komenti i individëve apo i subjekteve të caktuara, të cilat, gjatë këtyre 30 viteve, kanë pasur mundësinë dhe vendimmarrje të caktuara për të ngritur një sistem të mirëfilltë për të përballuar emergjenca të tilla ose fatkeqësi natyrore, që u përkasin të gjitha vendeve të rajonit. Natyrisht, ndërveprimi apo përballimi i fatkeqësive të tilla kërkon kapacitete, por kërkon edhe mbështetje, kërkon edhe një unifikim dhe një gatishmëri përtej hapësirave gjeografike të një vendi të caktuar. E them me përgjegjësi të plotë që pavarësisht se kapacitetet tona nuk mund të krahasohen me ato të vendeve të zhvilluara të BE- së apo të vendeve të tjera, por ajo që prevalon mbi të gjitha është gatishmëria, vullneti dhe lëvizja e të gjitha qytetarëve dhe e strukturave të shtetit shqiptar. Nuk besoj se dikush do të gjejë motivin për të identifikuar neglizhenca në këtë drejtim. Fatkeqësia përfshin gjithë shoqërinë. Strukturat kanë qenë kompakte dhe të harmonizuara", u shpreh Haki Çako. I pyetur për çështjen e pajisjeve dhe mungesave të theksuara që u evidentuan gjatë operacionet e kërkim- shpëtimit, Çako tha se teknologjia është një aspekt që ndihmon më shumë, por në të tilla ngjarje, ajo që ka më shumë rëndësi është vullneti i njerëzve që përfshihen në këto operacione. "Vullneti human dhe njerëzor prevalon mbi mjetet, mbi teknologjinë, e cila udhëhiqet nga njeriut. Gjithsesi, teknologjia ka efektet e veta dhe ne jemi duke punuar intensivisht për ngritjen e plotë të agjencisë kombëtare të mbrojtjes civile, që është institucioni kryesor që bën politikat e qeverisë për mbrojtjen civile e për reduktimin e riskut. Por të gjitha strukturat duhet të kompletohen në këtë aspekt. Sot, të gjitha njësitë administrative, bashkitë apo edhe institucionet e tjera, janë të detyruara të planifikojnë përpara se të ndodhin fatkeqësitë natyrore në buxhetin e tyre, 2- 4 % për njësitë vendore, për të gjitha institucionet", tha kreu i Emergjencave Civile.