Meta në Prokurori për Dvoranin, PS shmang me ligj Presidentin nga betimi i gjyqtarëve
ÇFARE PARASHIKON DRAFTI I RI I PS. PRESIDENTI: PROVA PER KREUN E KED
Presidenti Ilir Meta dëshmoi në Prokurorinë e Tiranës për kallëzimin e bërë ndaj kreut të KED- it, Ardian Dvorani.
Prokuroria ka shënuar procedim penal pa emër për kallëzimin dhe është duke kryer verifikimet dhe hetimet paraprake. Meta dëshmoi për rreth 40 minuta para prokurorit Alket Mersini, ndërsa në dalje të Prokurorisë iu përgjigj dhe interesit të medias për dëshminë e dhënë. Pas vlerësimit të kallëzimit të bërë nga Meta, Mersini kërkoi dje prej tij shpjegime shtesë. Presidenti i vendit, i shoqëruar nga dy këshilltarët e tij, tha për mediat se kishte dhënë gjatë deklarimit të dhëna plotësuese për kallëzimin e bërë disa javë më parë.
REAGIMI Presidenti Meta tha se Prokuroria ka mjaftueshëm prova në kallëzimin e bërë për të provuar fajësinë e Dvoranit për akuzën e "Shpërdorimit të detyrës" dhe "Përvetësim të kompetencave". "Të gjitha provat e depozituara deri tani janë të mjaftueshme që Prokuroria të veprojë ndaj Dvoranit, ne nuk bëjmë presione. Prokuroria ka pasur çështje të lidhura me tërmetin e 26 nëntorit, por kjo është një çështje që askush nuk mundet t'i shmanget, ne jemi të qetë dhe të duruar. Do të bashkëpunojmë ngushtë me Prokurorinë, ky është një rast flagrant", tha Presidenti. Teksa nuk deshi të flasë më gjatë, duke argumentuar se vendi ka tashmë çështje më të rëndësishme dhe parësore, siç është tërmeti dhe pasojat e tij, Meta shtoi se do të jetë bashkëpunues me Prokurorinë. "Rasti është tmerrësisht flagrant, unë shpresoj që Prokuroria të mos jetë nën presione politike dhe të bëjë punën me profesionalizëm dhe durim. Mendoj që kjo është provë e madhe për të gjithë të ardhmen e Reformës në Drejtësi", tha ai ndër të tjera.
TËRMETI Teksa paralajmëroi daljen e videos me faktet kundër Ardian Dvoranit, Meta nuk la pa përmendur tërmetin dhe tha se pavarësisht hetimeve dhe shkuarjes së tij në Prokurori, aktualisht janë çështje të tjera më të rëndësishme dhe se i ftonte të gjithë të merreshin me përballimin e pasojave të tërmetit. "Pa dashur të vazhdoj më tej me këtë çështje, sepse vendi ndodhet në një situatë të jashtëzakonshme pas tërmetit, por mund t'ju them se ne do të vijojmë të komunikojmë me qetësi, me durim, me argumente me të gjithë qytetarët shqiptarë, në mënyrë që të mbrohen dhe garantohen të drejtat e tyre kushtetuese. Sapo të kthehem në zyrë, Tedi Blushi do të publikojë spotin e parë për çështjen në fjalë. Presidenti ka qenë, është dhe do të jetë garant i Kushtetutës së Republikës së Shqipërisë. I fton të gjithë të merren me përballimin e pasojave të tërmetit në mënyrë të përgjegjshme. Presidenti e di shumë mirë detyrën e tij", tha Meta.
KALLËZIMI Meta kërkon nga Prokuroria hetimin e Dvoranit për dy akuza, atë të "Shpërdorimit të detyrës" dhe "Përvetësimi i titullit apo i detyrës shtetërore". Në 35 faqe, Meta argumenton se kreu i KED- it ka shpërdoruar detyrën me dërgimin e listave në të njëjtën datë në organet e emërtesës dhe se ky veprim është "veprim i ndërgjegjshëm kriminal". Më tej, në kallëzim kreu i shtetit thotë se Dvorani e ka shpërdoruar detyrën edhe në mospublikimin e procesverbaleve të mbledhjeve dhe mosmarrja e masave për përmbushjen e kësaj detyre. Meta thotë se publikimi në Fletoren Zyrtare i vendimit, që i hapte rrugë marrjes së detyrës nga ana e Arta Vorpsit, është një veprim me të cilin kreu i KED- it ka tentuar të marrë kompetencat e Presidentit të Republikës. Presidenti i kërkon Prokurorisë që të bëjë sekuestrimin e disa procesverbaleve të mbledhjeve, që sipas tij kanë të dhëna të vlefshme për hetimet që kërkohen të kryhen. "Presidenti i Republikës i rekomandon organit të Akuzës të sekuestrojë menjëherë kopje të regjistrimeve nga sistemi i regjistrimit audio për të gjitha mbledhjet e Këshillit të Emërimeve në Drejtësi, prej të cilave do të zbulohen edhe fakte e të dhëna shtesë, përtej atyre të parashtruara në këtë kallëzim", shkruhet në kallëzim. Mungesa e transparencës Meta ndër të tjera shkruan në padi se si kreu i institucionit, Dvorani, duhet të kishte bërë publikimin e procesverbaleve të mbledhjeve dhe nga këqyrja e faqes së internetit të KED- it rezulton se nuk e ka bërë.
"Gjithashtu, edhe mosbotimi i përmbledhjes së procesverbaleve të mbledhjes së KED- it dhe mosmarrja e masave për përmbushjen e kësaj detyre që i ngarkohet kryetarit të KED- it, përveçse ka cenuar punën dhe kompetencat e Avokatit të Popullit, përbën shkelje të hapur të dispozitave të ligjit nr. 115/ 2016 dhe akteve nënligjore të KED- it ( Rregullores së Funksionimit të Këshillit), veprime kriminale këto që përmbajnë në mënyrë kumulative elementet e figurës së veprës penale të shpërdorimit të detyrës, të parashikuar nga neni 248 i Kodit Penal", shkruhet në kallëzim.