Gazetarët dhe ndërkombëtarët frenojnë ligjin e ri për median
Ndërkombëtarët: AMA ka shumë kompetenca të gjera për dënimin e mediave, po ashtu edhe përmasat e gjobave janë të larta
Shoqatat e gazetarëve në Shqipëri dhe një pjesë e shoqërisë civile i kërkuan qeverisë që të tërheqë dy projektligjet, të njohura si paketa antishpifje.
Për të folur para deputetëve të Komisionit të Ligjeve, organizatat e gazetarëve dhe shoqërisë civile kishin mandatuar kreun e Unionit të Gazetarëve, Aleksandër Çipa, për të lexuar një deklaratë të përbashkët. Në fjalën e tij, Çipa kërkoi që qeveria të tërhiqet nga dy projektligjet. “Ne i kërkojmë qeverisë që të tërheqë dy projektligjet që i janë propozuar Kuvendit, të prezantuara publikisht si paketa antishpifje. Gjithashtu, i bëjmë thirrje Kuvendit që në rast se qeveria nuk i tërheq ato, t’i rrëzojë menjëherë”, tha Çipa. Ndërkohë, nga ana tjetër Çipa tha se dy draftligjet e qeverisë u japin kompetenca gjysmëgjyqësore dy institucioneve publike, që nuk kanë besimin se janë të pavarura që të bëjnë rregullimin e mediave online. “Organizatat vërejnë që dy projektligjet e paketës antishpifje i akordojnë AMA- s dhe AKEP- it kompetenca gjyqësore me natyrë sanksionuese, në një kohë kur këto dy organe, edhe pse të pavarura, sipas ligjit nuk ofrojnë garanci funksionale për të qenë të pavarura, siç garantojnë organet gjyqësore. Shqipëria ka mjaftueshëm ligje që rregullojnë çështjet kur mediat shkelin të drejtat e të tjerëve dhe çdo ndërhyrje tjetër”, vijoi Çipa. Pas kësaj deklarate, ata kërkuan që të largoheshin dhe të mos kishin asnjë kontakt me komisionin derisa të merreshin në konsideratë kërkesat e tyre, por ndryshuan qëndrim pas kërkesës së deputetëve të maxhorancës për të vazhduar seancën dëgjimore. REGJISTRIMI I PORTALEVE Relatorja e draftligjeve, Klotilda Bushka, e orientoi diskutimin te çështjet konkrete, siç ishte regjistrimi i portaleve në një sistem që të jenë lehtësisht të kontaktueshme nga institucionet gjyqësore, në rast se një qytetar bën një kallëzim ndaj një medie. “Unë nuk kam qartësi nga ju. Ju nuk keni propozime fare, përderisa jeni kundër që në fillim. Sot në Shqipëri ka ligje edhe për shpifjen, por si do ta zgjidhni ju vetërregullimin, kur subjekti i paditur, që janë ofruesit e shërbimit e mediave online, nuk ekziston i regjistruar. Për këtë çështje unë nuk shoh një mënyrë vetërregullimi”, tha Bushka. Por këtë pretendim të deputetes e rrëzoi drejtoresha e BIRN Albania, Kristina Voko, e cila i kujtoi Bushkës se këtë e ka rregulluar AKEP- i një vit më paerë. “Lidhur me regjistrimin nëse është ky shqetësimi kryesor i dy projektligjeve, ju siguroj që ndryshimet e fundit të bëra në AKEP e kanë siguruar regjistrimin. AKEP- i ishte shumë i aftë të identifikonte me emra dhe me e- maile të gjitha mediat online, për të dërguar kërkesën e publikimit të detyrueshëm të llogarive bankare ku duhet të mbështetej e- Albania. Kështu që, nuk qëndron si argument shqetësimi i regjistrimit. AKEP- i ka qenë shumë i aftë të mbyllë mediat që kanë kryer shkelje”, tha Voko. NDËRKOMBËTARËT Përfaqësues të organizatave ndërkombëtare në Tiranë shprehën përsëri shqetësimin e tyre, se projektligjet e reja të qeverisë, të ashtuquajturat “paketa antishpifje”, mund të kufizojnë lirinë e medias shqiptare. “OSBE mendon se AMA ka shumë kompetenca të gjera për dënimin e mediave, po ashtu edhe përmasat e gjobave ndaj gazetarëve dhe mediave janë të larta. Po ashtu, duhet ndarë qartë se çfarë janë kritikat politike dhe çfarë janë shpifjet. Raporti i ODIHR- it për zgjedhjet e fundit vërejti një përqendrim të madh të medias në duar të pak pronarëve”, tha para deputetëve Irina Radu, shefe e Zyrës së Medias e OSBE- së.