Presidenti falënderon specialistët nga Izraeli: Të zbatohen udhëzimet
Presidenti i vendit, Ilir Meta, priti dje në një takim ekipin e specialistëve izraelitë, të cilët prej disa ditësh kanë ardhur në Shqipëri, për të asistuar inxhinierët shqiptarë në verifikimin e dëmeve të shkaktuara nga tërmeti tragjik i 26 nëntorit. Presidenti Meta ka shprehur mirënjohjen për ndihmën e madhe që ekipi nga Izraeli po jep në terren, përmes inspektimesh të specializuara dhe me aparatura, të cilat japin një përgjigje të saktë mbi gjendjen e godinave.
"I nderuar të prisja ekipin izraelit, që u erdhi në ndihmë qytetarëve tanë, duke vlerësuar dhe këshilluar për shtëpitë dhe ndërtesat e dëmtuara nga tërmeti. Thellësisht mirënjohës Izraelit dhe ekspertëve të tij ushtarakë! Shalom!", ka shkruar Meta, në faqen e tij në "Facebook".
Po ashtu, ai ka asistuar në një inspektim që specialistët izraelitë kanë realizuar në fshatin Armathë. Duke iu referuar inspektimit me aparatura të një teknologjie të avancuar, Meta u shpreh se pas vlerësimit nga specialistët izraelitë, banorët janë më të qartë dhe nuk u mbetet veçse të zbatojnë udhëzimet, por me përgjegjshmëri.
"Sapo përfunduam një verifikim të ri të një banesë 4katëshe në Armathë, me ekspertët e palodhur izraelitë. Besoj se tani edhe banorët janë më të qartë dhe të qetë se pardje. E rëndësishme është tani të ndjekim udhëzimet e duhura për përforcimin dhe riparimet e dëmeve me përgjegjësi të plotë ligjore", tha Meta, i cili ka takuar edhe banorë të zonës.
Ekipi izraelit, i përbërë nga 10 inxhinierë, prej disa ditësh ndodhen në Shqipëri. Ata po bëjnë vlerësimin e dëmit, kryesisht në zonën e Durrësit, por edhe në zona të tjera dhe objekte të veçanta, siç ishte selia e Kryegjyshatës Botërore në Tiranë. Përmes kamerave termike ata kryejnë skanimin e skeleterisë së ndërtesave. Sipas tyre, lajmi i mirë është që mbi 90% e ndërtesave, në dukje tejet të dëmtuara, kanë një strukturë të fortë dhe kanë nevojë vetëm për riparime cilësore në muraturë. Ekipi izraelit po bashkëpunon me inxhinierët shqiptarë, me qëllim që t'u përcjellin këtyre të fundit përvojën që ata kanë në këtë fushë dhe për t'u mësuar metodologjinë, mbi të cilën të mund të mbështeten, pas largimit të tyre në Izrael. Në të gjitha takimet me autoritete shqiptare, specialistët nga Izraeli janë shprehur se ata janë të gatshëm të ndihmojnë këdo në kushte të tilla, por në rastin e Shqipërisë, e kanë një arsye më shumë: ndihmën që shqiptarët u kanë dhënë hebrenjve gjatë Luftës së Dytë Botërore.