Drafti i PS, si shmanget Presidenti në betimin e anëtarëve të Kushtetueses
Maxhoranca propozon ndryshime në ligjin organik të Kushtetueses: Nëse anëtari i Gjykatës nuk thirret nga Presidenti, betohet me shkrim
Përplasja President- maxhorancë, në lidhje me plotësimin e vakancave në Gjykatën Kushtetuese, dje ka shkuar në një tjetër shkallë. Ashtu siç kishin paralajmëruar disa funksionarë të lartë të Partisë Socialiste, është konkretizuar nisma ligjore për të ndryshuar mënyrën e betimit të anëtarëve të Gjykatës Kushtetuese.
Projektligji që do t'i shkojë shumë shpejt për miratim Kuvendit, parashtron një mënyrë tjetër për ata që zgjidhen për në Gjykatën Kushtetuese, duke mos e bërë të domosdoshëm betimin para kreut të shtetit. Sipas këtij projektligji, që ndryshon dy nene të ligjit organik për Gjykatën Kushtetuese, anëtari i zgjedhur për të shkuar në këtë Gjykatë, firmos formulën e betimit, e cila i dërgohet Presidencës dhe në këtë formë eliminohet ceremonia e betimit para kreut të shtetit me dorën në Kushtetutë, siç ka qenë deri më tani. "Në nenin 8, paragrafi 1, shtohet fjalia e dytë me këtë përmbajtje: ' Presidenti i Republikës organizon ceremoninë e betimit jo më vonë se 10 ditë nga data e zgjedhjes, emërimit ose shpalljes të emëruar të anëtarit të Gjykatës Kushtetuese. Nëse anëtari i Gjykatës Kushtetuese nuk thirret për të bërë betimin, pas përfundimit të këtij afati, ai e kryen betimin në formë të shkruar dhe ia dërgon atë Presidentit të Republikës, organit të emërtesës dhe Gjykatës Kushtetuese. Data e organizimit të ceremonisë së betimit ose data e dërgimit të betimit me shkrim, konsiderohet si dita e betimit dhe e fillimit të detyrës së gjyqtarit të Gjykatës Kushtetuese dhe përfshihet në dosjen e tij personale. Në rast se gjyqtari nuk pranon të bëjë betimin, mandati i tij përfundon", thotë neni 1 i këtij projektligji. Me gjithë ndryshimin e propozuar për ligjin organik, neni 129 i Kushtetutës së Shqipërisë thotë: "Gjyqtari i Gjykatës Kushtetuese fillon detyrën pasi bën betimin para Presidentit të Republikës". Gjithashtu, në nenin 2 të këtij projektligji, thuhet se aplikimi i tij vlen për të gjithë anëtarët e emëruar në
Gjykatën Kushtetuese, por që nuk kanë bërë betimin para Presidentit. "Në nenin 86, pas pikës 4 shtohet pika 5 me këtë përmbajtje: 5. Gjyqtarët e zgjedhur, të emëruar ose të shpallur të emëruar, por që nuk kanë bërë betimin, me hyrjen në fuqi të këtij ligji betohen sipas rregullave të këtij ligji", thotë neni 2 i projektligjit. Ky nen i shkon për shtat Arta Vorpsit, e cila aktualisht është e vetmja që konsiderohet si e zgjedhur anëtare e Gjykatës Kushtetuese, por që nuk ka bërë betimin para Presidentit. Ky i fundit, në ceremoninë e betimit, disa javë më parë thirri Marsilda Xhaferllarin, e cila ishte e renditur e katërta në listën e dytë që i kishte shkuar Metës nga kreu i KED- it, Ardian Dvorani. Ky ndryshim i ligjit organik për formimin e Gjykatës Kushtetuese që propozohet nga Partia Socialiste, e bën de fakto Arta Vorpsin anëtare të GJK. Vorpsi ishte shpallur si e zgjedhur, duke qenë se Presidenti Meta nuk ishte shprehur brenda 30 ditëve për emrin e dytë të listës që i kishte shkuar dhe Vorpsi, e renditur e para, shkoi automatikisht në Gjykatën Kushtetuese, madje ajo bëri dhe betimin në një zyrë noterie. Pasi Kuvendi votoi Elsa Toskën dhe Fiona Papajorgjin, Presidenti nxori dekretin që emëronte si anëtare të Gjykatës Kushtetuese Marsilda Xhaferllarin, me pretendimin se nuk ishte shprehur për emrin e dytë që i takonte. Pas këtij ndryshimi në ligj, dilemat për formimin e Gjykatës Kushtetuese bëhen akoma dhe më të mëdha, pasi përveç Elsa Toskës, Fiona Papajorgjit dhe Vitore Tushës që janë anëtare të gjithëpranuara, 2 emrat e tjerë prodhojnë debat. Besnik Muçi u largua pasi nuk kaloi vetingun, ndërsa mbetet për t'u parë se kush do të marrë karrigen e anëtarit të Gjykatës Kushtetuese, Xhaferllari apo Vorpsi.