Mark Rutte: Shqipëria nuk është gati për negociata
Kryeministri holandez: Maqedonia e Veriut, më afër integrimit
Holanda mbetet e vendosur për të mos pranuar asnjë negociatë me Shqipërinë për anëtarësim në BE.
Dy muaj pas vendimit negativ të Këshillit Europian për të mos hapur negociatat me Shqipërinë dhe Maqedoninë e Veriut për t'u anëtarësuar në Bashkimin Europian, Kryeministri i Holandës, Mark Rutte, ka përsëritur qëndrimin se Tirana nuk është ende gati për të hapur negociatat me BE- në. Në një prononcim për gazetën malazeze "Pobjeda", Rutte deklaroi nga Londra: "Holanda nuk është kundër zgjerimit të BE- së, por shtetet duhet të jenë gati, si në rastin e Malit të Zi, për të nisur negociatat. Ne nuk besojmë se Shqipëria është gati të nisë negociatat me BE- në në këtë moment, ndërsa Maqedonia e Veriut është më afër këtij qëllimi". Rutte komentoi edhe vendimin e tetorit për dy shtetet ballkanike, duke theksuar se negociatat për Shkupin nuk u hapën, pasi disa shtete të BEsë nuk donin ta ndanin nga Shqipëria. Holanda iu bashkua qëndrimit të Francës më 18 tetor, se Shqipëria dhe Maqedonia e Veriut nuk ishin gati për hapjen e negociatave. Madje, Holanda ishte pro ndarjes së Maqedonisë së Veriut nga Shqipëria, duke pranuar hapjen e negociatave për vendin fqinj, por ka qenë vendosmëria e Presidentit francez, Emmanuel Macron, për të mos i ndarë dy vendet ballkanike në këtë vendimmarrje. Refuzimi i Shqipërisë nga Holanda është justifikuar me faktin se shqiptarët përbëjnë numrin më të madh të të dënuarve në këtë vend për vepra penale, përfshi këtu trafikun e drogave të forta nga Amerika Latine. Pak para vendimit të Këshillit Europian të 18 tetorit, Kryeministri holandez ka qenë i palëvizshëm në qëndrimin e tij për të mos hapur negociatat me Shqipërinë. Gjatë një deklarate pas takimit me Kancelaren gjermane, Angela Merkel, në muajin tetor, Mark Rutte deklaroi se Holanda është e shqetësuar për progresin e Shqipërisë dhe ende nuk kishte vendosur nëse ky progres është i mjaftueshëm për të hapur negociatat me BE- në. "Ne jemi po aq të shqetësuar sa edhe vendet e tjera. Për Maqedoninë e Veriut një çikë më pak dhe për Shqipërinë pak më shumë. Pyesim veten nëse Shqipëria ka bërë progres të mjaftueshëm dhe në këtë aspekt jemi shumë të shqetësuar. Prandaj, do ta diskutojmë këtë çështje me partnerët tanë europianë në javët e ardhshme. Maqedonia e Veriut ka arritur më shumë sesa Shqipëria dhe kjo do të jetë në fokus të bisedimeve. "Më ketë qëndrim, Kryeministri holandez mbështeti deklaratën e ministrit të Jashtëm, Stef Blok, i cili kishte deklaruar se nuk ka "asnjë të dhënë se diçka ka ndryshuar ndërkohë në Shqipëri" dhe se me shumë gjasa Parlamenti holandez nuk do ta ndryshojë vendimin e tij të qershorit për të bllokuar qeverinë të votojë pro hapjes së negociatave mes BE- së dhe Shqipërisë.