Ministri gjerman, Maas: Ju mbështesim për në BE
Cakaj: Gjermania, pro hapjes së negociatave në 2020
Ministri në Detyrë për Europën dhe Punët e Jashtme ndodhet në një vizitë zyrtare në Berlin, ku zhvilloi një takim me homologun e tij gjerman, Heiko Maas. Takimi u përqendrua në diskutime të hollësishme për domosdoshmërinë e fuqizimit të procesit të zgjerimit të BE- së në Ballkanin Perëndimor dhe rëndësinë e çeljes së negociatave për anëtarësim për Shqipërinë vitin e ardhshëm. Në një reagim në "Facebook", Cakaj bëri të ditur: "Shqipëria gëzon mbështetjen e Gjermanisë për hapjen e negociatave vitin që vjen!" Gjithashtu, homologët ndanë qëndrime të njëjta lidhur me vazhdimin e reformave transformuese të Shqipërisë dhe plotësimin e kushteve të paraqitura nga Bundestagu në funksion të rrugëtimit europian. Mbështetja e Gjermanisë për zhvillimin institucional e demokratik dhe rrugëtimin europian të Shqipërisë mbetet rrënjësore. Sa u përket zhvillimeve të fundit në Shqipëri, Cakaj shprehu mirënjohjen për mbështetjen e jashtëzakonshme të Gjermanisë për përballimin e pasojave të tërmetit. Nga ana tjetër, Maas konfirmoi gatishmërinë e tij të mëtejme për ta ndihmuar Shqipërinë në planin e riparimit dhe rindërtimit. Gjithashtu, gjatë qëndrimit në Berlin, kreu i diplomacisë shqiptare mori pjesë edhe në hapjen e konferencës së nivelit të lartë që po zhvillohet nën kujdesin e ministrit të Jashtëm gjerman, Heiko Mass, me temë "Advokimi për të drejtat e njeriut në shekullin 21". Gjatë qëndrimit të tij në Bruksel, ministri në detyrë për Europën dhe Punët e Jashtme zhvilloi një takim me ministrin e Jashtëm të Greqisë, Nikos Dendias. Ky takim kishte në fokus diskutime mbi ndryshimet pozitive që kanë ndodhur në Shqipëri, me theks të veçantë në përmbushjen e objektivave të përcaktuara nga Këshilli i Çështjeve të Përgjithshme në qershor 2018, për të mundësuar çeljen e bisedimeve për anëtarësim në BE pas miratimit të metodologjisë së re të negociimit. Gjithashtu, të dy homologët diskutuan edhe për një varg veprimesh të përbashkëta në funksion të riparimit e rindërtimit të hapësirave të dëmtuara nga tërmeti. Në një reagim në "Facebook", Cakaj shprehu mirënjohjen e veçantë për mbështetjen e pakursyer të Greqisë për Shqipërinë që prej orëve të para të pastërmetit e deri tani, që po vazhdon me përkushtim të fortë dhe rezultate konkrete.