Negociatat, Maqedonia kërkon ndarjen nga Shqipëria
Ministri Dimitrov: Më mirë njëri në Europë sesa asnjë
Ministri i Jashtëm i Maqedonisë, Nikola Dimitrov, hedh idenë e ndarjes së dy vendeve ballkanike në procesin e hapjes së negociatave me BE- në. Ai shprehet se vlerësimi duhet bërë sipas meritës dhe ndarjen e Maqedonisë së Veriut nga Shqipëria nëse është e nevojshme. Në një intervistë, ministri maqedonas tha se "Zgjidhja më e mirë do ishte hapja e negociatave me të dyja vendet. Por nëse kjo nuk është e mundur, është më mirë hapja e dyerve të Europës qoftë edhe për njërin nga ne, sesa për asnjë". Sipas ministrit Dimitrov, ' Suksesi i një vendi është lajm i mirë për të gjithë rajonin. Si fqinj të mirë, ne besojmë se Tirana do jetë në gjendje të nisë rrugëtimin europian. Sigurisht që zgjidhja më e mirë do ishte hapja e negociatave me të dyja vendet tona. Por nëse kjo nuk është e mundur, është më mirë hapja e dyerve të Europës qoftë edhe për njërin nga ne, sesa për asnjë". Vendimi i Këshillit Europian më 18 tetor për të mos hapur negociatat me Shqipërinë dhe Maqedoninë e Veriut u shoqërua me deklarata të shumta të liderëve europianë, që theksonin progresin e bërë veçanërisht nga Maqedonia e Veriut. Një prej shteteve, Holanda, vlerësoi punën e bërë nga Maqedonia, por kishte rezerva të mëdha nëse përparimi i Shqipërisë është i mjaftueshëm dhe në hapat e duhur. ministri i Jashtëm holandez, Stef Blok, ka shprehur të njëjtën ide si ministri i Jashtëm i Maqedonisë së Veriut, teksa tha se: "Dy vendet mund të vlerësohen ndarazi dhe sipas meritës". Por deri më tani nuk ka një diskutim konkret mes shteteve të BE- së për ndarjen ose jo të dy vendeve. Përkundrazi, Presidenti francez, Emmanuel Macron, i anatemuar në Ballkan si djali planprishës i zgjerimit të Europës, disa ditë më parë tha gjatë një konference për shtyp në Londër, se nuk dëshironte t'i ndante nga njëra tjetra Shqipërinë dhe Maqedoninë dhe se gjithashtu i njeh përpjekjet që kanë bërë këto dy vende në aspektin e reformave, por së pari duhet të reformohen procedurat e hapjes së negociatave, të cilat, sipas Macron, duhet të jenë "të diferencueshme dhe të pakthyeshme, më shumë se politike dhe strategjike". Tani presioni i Maqedonisë së Veriut dhe Shqipërisë është në Komisionin e ri Europian. Ministri i Jashtëm maqedonas ka takuar tashmë Komisionerin e Zgjerimit, Olivér Várhelyi, por është e qartë se propozimi i tij është një rrugë e përpjetë. Ndërsa presin të reja nga Brukseli, dy vendet Ballkanike kanë nisur punën për forcimin e aleancës rajonale dhe me Serbinë kanë nënshkruar një lloj Shengeni Ballkanik, një marrëveshje që favorizon lëvizjen e mallrave dhe njerëzve në të tria vendet.