Kapet skafi me 334 kg hashash në brigjet e Brindisit

Arrestohet skafisti shqiptar 32- vjeçar. Droga me vlerë 4 milionë euro u gjet e fshehur në gomone

Guardia di Finanza realizoi dje një tjetër operacion të rëndësishëm në brigjet e Brindisi, duke sekuestruar një ngarkesë të madhe droge.

Gjatë një patrullimi rutinë detar, një njësi e Departamentit të Operacioneve Aeronavale Bari, Seksioni i Operacioneve Detare të Brindisit, pikasi një skaf, të cilin e ndaloi disa milje larg bregut. Tipologjia e mjetit, pozicioni i pazakontë dhe deklaratat e paqarta dhe kontradiktore të skafistit bënë që forcat e Guardia di Finanza- s të drejtonin gomonen e dyshimtë drejt bregut për të kryer një kontroll të imtësishëm. Mediat italiane shkruanin dje se në bordin e skafit, në një ndarje nën urën e komandës, efektivët gjetën 186 pako të mbështjella me celofan, me një peshë totale prej 310 kg marijuanë dhe 24 kg hashash. Sasia e drogës së sekuestruar përllogaritet në 4 milionë euro, pas shpërndarjes në tregun e jashtëligjshëm. Policia e Shtetit tha dje se strukturat e Guardia di Finanza- s, në bashkëpunim me Policinë shqiptare, kanë realizuar një operacion antidrogë të suksesshëm. Skafisti, shtetasi shqiptar me inicialet F. I., 32 vjeç, është arrestuar në vendngjarje dhe njëherësh janë kryer procedurat e sekuestrimit të mjetit dhe provave të tjera materiale. Mjeti lundrues ishte rreth 5 metra i gjatë, me një motor të jashtëm mjaft të fuqishëm. "Operacioni aeronaval që u zhvillua ditën e djeshme, konfirmon efikasitetin e kontrollit detar që ushtrohet nga Guardia di Finanza për të luftuar trafiqet e paligjshme që tentojnë të hyjnë drejt BEsë, sinergjinë me strukturat e Frontex- it, si dhe bashkëpunimin e qëndrueshëm dhe të konsoliduar tashmë me autoritetet e Policisë së Shtetit edhe nëpërmjet zyrave ndërlidhëse në Bari e Durrës", shkruhet në raportin zyrtar të Guardia di Finanza- s.