Kushtet e Milanit s'e bindin, Ibra kërkon garanci absolute
"Ibra nuk do të vijë te Bolonja, pasi ka bërë zgjedhje të tjera". Kanë qenë këto fjalët e drejtorit sportiv të Bolonjës, Valter Sabatini, i cili i jep fund ëndrrës së tifozëve kuqeblu për të parë me bluzën e tyre bomberin suedez. Por, mbi të gjitha, kjo është edhe një indicie më shumë që nënvizon se Zlatan Ibrahimoviç ka zgjedhur Milanin. Gjithsesi, bisedimet mes sulmuesit me origjinë boshnjake dhe "Djallit" vazhdojnë dhe madje çështje për t'u biseduar ende ka plot, duke qenë se, siç nënvizon "Sportmediaset", 38vjeçari nuk është aspak dakord me kushtet e fundit që i kanë paraqitur drejtuesit kuqezinj. Ndonëse akordi nuk duhet aspak në rrezik, administratori Ivan Gazidhis duhet të ndryshojë ofertën e bërë, ku ajo që nuk i pëlqen aspak Ibrës është klauzola e vënë në dokumentacionin e paraqitur menaxherit Mino Raiola, i cili thekson se rinovimi për sezonin 20202021 me 4 milionë euro neto si pagë, mund të aplikohet vetëm nëse skuadra do të arrijë të kapë zonën Champions, objektiv që aktualisht është 9 pikë larg ( 20 pikë për kuqezinjtë, 29 për Kaljarin dhe Romën që ndajnë vendin e katërt). Ndërkohë, Ibrahimoviç ka qenë i qartë që në fillim dhe nuk ka ndërmend që të pranojë kushtin e fundit të Milanit: 18 muaj kontratë përpara se t'i japë fund futbollit të luajtur dhe të nisë aventurën si drejtues dhe aksioner, në Suedi, te skuadra e Hamarbit. Aktualisht, sulmuesi vazhdon që të jetojë së bashku me familjen e tij në Los Anxheles, sepse pa gjetur dakordësinë nuk ka ndërmend që të lëvizë nga Amerika, prandaj Milani duhet të vendosë të nxitojë, duke parë se nga ana e tij, vetë Ibra e ka bërë një lëshim të vogël, mbi pagesën e 6 muajve deri në fund të këtij sezoni. Nëse Milani i kishte ofruar vetëm 2 milionë, ndërsa kërkesa e Raiolës dhe lojtarit ishte 3, nordiku ka theksuar se është gati të pranojë një rrugë të mesme prej 2.5 milionë eurosh, plus 4 milionë për sezonin e ardhshëm. Prandaj, nëse "Djalli" kërkon realisht që të bëjë realitet rikthimin e Zlatan Ibrahimoviçit, duhet të formulojë kërkesën definitive prej 6.5 milionë eurosh neto për 18 muaj dhe shtrëngimi i duarve do të jetë thjesht një formalitet, këtë javë apo maksimumi javën në vazhdim.