Të përndjekurit, emrat që marrin dëmshpërblimin
Lista e Financave me të përndjekurit dhe trashëgimtarët që marrin këstin e tretë të dëmshpërblimit. Afati, deri në fund të vitit dhe dokumentet që duhen
Për dorëzimin e dokumenteve, familjarët e ishtë përndjekurve që nuk jetojnë kanë tre muaj kohë në dispozicion.
Veç numrit të llogarisë dhe kopjes së kartës së identitetit, duhet po ashtu certifikatë vdekjeje, certifikatë të trungut familjar, dëshmi trashëgimie dhe prokurë. "Brenda një afati 3- mujor nga data e publikimit të listës, të gjithë ish- të përndjekurit, të cilët janë pjesë e saj, duhet të dorëzojnë në strukturën përgjegjëse të Ministrisë së Financave dokumentet e parashikuara në aktet nënligjore, që janë nxjerrë në zbatim të ligjit", specifikohet në ligj, ku thuhet po ashtu se me kalimin e kësaj periudhe, personi që nuk ka plotësuar dokumentacionin e kërkuar, humbet të drejtën e dëmshpërblimit.
PËRFITUESIT Gazeta boton sot emrat e 300 trashëgimtarëve që kanë detyrimin për të plotësuar dosjen. Pas çeljes së këstit të tretë, gati një vit më parë, Ministria e Financave ka marrë në shqyrtim më shumë se 1800 dosje nga radhët e të dënuarve që nuk jetojnë. Një pjesë e familjarëve kanë arritur të marrin dëmshpërblimin me fondin e këtij viti. Por për shkak të ezaurimit të tij, pjesa e mbetur e pagesave do të zhvendoset vitin që vjen. Edhe në 2020, ashtu si këtë vit, janë adresuar 2 miliardë lekë ose rreth 20 milionë dollarë që në pjesën më të madhe do të përdoren për trashëgimtarët, duke qenë se procesi për kategorinë parësore është thuajse i përfunduar.
PROCESI Ministria e Financave ka bërë me dije edhe procedurat që do të ndiqen në rastet kur njëri prej përfituesve të radhës së dytë ndërron jetë. "Kur një trashëgimtar i radhës së dytë nuk jeton, e drejta e tyre për dëmshpërblim në bazë të ligjit nr. 9831, datë 12.11.2007 ' Për dëmshpërblimin e ish- të dënuarve politikë të regjimit komunist', i ndryshuar, nuk vazhdon më tej. Në këtë rast, shpërndarja e vlerës të këstit të radhës kryhet sipas rrethit të familjarëve, për trashëgimtarët që jetojnë".