Meta publikon videon: Si u përdor Dvorani për kapjen e Kushtetueses
Ashtu siç kishte premtuar më se 1 muaj më parë, Presidenti Ilir Meta publikoi dje një video, ku rendit shkeljet e pretenduara nga kreu i Këshillit të Emërimeve në Drejtësi. Në videon e shpërndarë edhe në rrjetet sociale, Meta ka bërë një paraqitje të të gjitha ngjarjeve që ndodhën muajt e fundit, që nga shpallja e kandidatëve të Gjykatës Kushtetuese, te dërgimi i listave nga KED, te Kuvendi dhe Presidenti, e deri te votimi dhe dekretimi i tyre. Kreu i shtetit e cilëson këtë sjellje të kreut të KED- së si një përdorim për të kapur Gjykatën Kushtetuese. Në këtë video, Presidenti vë theksin në bllokimin 2- vjeçar të Këshillit të Emërimeve në Drejtësi deri në emërimin e Ardian Dvoranit në krye të tij. "KED është një organ kolegjial që ka për detyrë nga ana administrative të ndihmojë Presidentin, Kuvendin dhe Gjykatën e Lartë, të zgjedhin anëtarët e Gjykatës Kushtetuese, për plotësimin e vakancave të tyre sipas radhës kushtetuese dhe kritereve që dikton qartë Kushtetuta dhe ligji për Gjykatën Kushtetuese. Justifikimi i maxhorancës për bllokimin e KED në vitet 2017 dhe 2018 ishte se anëtarët e KED nuk kishin kaluar procesin e vetingut. Por me zgjedhjen e Dvoranit, vetingu nuk ishte më kusht", thuhet në videon e publikuar nga Meta. Presidenti thekson se me këtë skemë të përdorur, kreu i KED tentoi që t'i jepte maxhorancës një anëtar më tepër në Gjykatën Kushtetuese. Si vazhdim i kësaj tentative, sipas Presidentit, ishte edhe shpallja në Fletoren Zyrtare si anëtare e Gjykatës Kushtetuese e Arta Vorpsit dhe mbajtja pezull e Marsilda Xhaferllarit. "Qëllimi i pastër i kësaj skeme të Dvoranit ishte t'i jepte maxhorancës në mënyrë të paligjshme një anëtar më shumë për të prishur balancat në Gjykatën Kushtetuese duke vetëshpallur në kundërshtim me Kushtetutën, kandidaturën e paracaktuar të Arta Vorpsit. Në funksion të këtij qëllimi, Dvorani botoi me iniciativë personale dhe në mënyrë antiligjore emrin e saj në Fletoren Zyrtare në 9 nëntor 2019", thuhet ndër të tjera në video.