Ministri i Jashtëm italian: Ulni tensionet dhe vendosni dialogun
“Vlerësojmë mbështetjen e plotë të Italisë për integrimin në BE”
Presidenti Ilir Meta i ka kërkuar ndihmë Italisë përmes ministrit të Jashtëm, Luigi di Maio, për të rindërtuar banesat e shembura pas tërmetit të 26 nëntorit. Pas takimit me Kryeministrin Rama dhe liderin e opozitës, di Maio u takua edhe me kreun e shtetit shqiptar. Përmes një njoftimi për shtyp, zyra e medias së presidencës njoftoi se Presidenti e ka falënderuar ministrin italian për ndihmën e Italisë dhe i kërkoi ndihmë atij për të kaluar fazën pas tërmetit. “Kreu i shtetit shprehu mirënjohjen e thellë për ndihmën e menjëhershme të dhënë nga Italia mike në operacionet e kërkim- shpëtimit pas tërmetit të 26 nëntorit 2019 që goditi vendin tonë, si dhe kërkoi asistencën italiane edhe për rindërtimin dhe rehabilitimin e zonave të prekura”, bën me dije presidenca. Edhe Presidenti Meta ia njeh Italisë përpjekjet që bën për anëtarësimin e
Shqipërisë në Bashkimin Europian. “Për rajonin, nuk ka alternativë tjetër veç integrimit në Bashkimin Europian, ndaj e vlerësojmë mbështetjen e plotë të Italisë për këtë objektiv madhor”, u shpreh kreu i shtetit. Të dy vlerësuan faktin se Italia është ndër vendet e para për shkëmbimin më të madh ekonomik më Shqipërinë, por kreu i shtetit mësohet se ka kërkuar prani më të madhe të bizneseve italiane në vendin tonë. “Gjithsesi, ne presim një prani më të madhe në sektorë strategjikë të investitorëve kryesorë italianë në Shqipëri, duke shprehur njëkohësisht gatishmërinë për të promovuar praninë e investimeve të mëdha italiane në Shqipëri”, theksoi kreu i shtetit. Urë e fuqishme bashkëpunimi ndërmjet dy vendeve, sipas kreut të shtetit janë edhe komuniteti arbëresh dhe emigracioni shqiptar në Itali.