Basha për festën e PD: Jemi partia e shpresës
"Shqiptarët i kanë sytë nga ne për të finalizuar misionin"
MARIGLEN KUME Kreu i selisë blu, Lulzim Basha, uroi dje demokratët për ditëlindjen e 29- të të Partisë Demokratike. Basha e nisi postimin e tij me fjalët "Liri- Demokraci", dy fjalë që, sipas tij, i rikthyen frymëmarrjen një kombi, i cili prej rreth 5 dekadash u udhëhoq nga Enver Hoxha.
Ndër të tjera, në statusin e tij, lideri i opozitës përmendi arritjen më të madhe të Partisë Demokratike. "Për 29 vite, Partia Demokratike ia ka dalë të jetë partia e shpresës. Kjo është arritja jonë më e madhe në këto 29 vjet. Sot, shqiptarët i kanë sytë nga ne për të finalizuar misionin, për të cilin u themelua Partia Demokratike si garante e lirisë, e demokracisë dhe e mirëqenies së qytetarëve shqiptarë", shkroi Basha. Njëkohësisht, numri një i PD- së nuk la mënjanë mesazhet për situatën aktuale të politikës. "Shqiptarët meritojnë të votojnë të lirë për qeverisjen e tyre, ata meritojnë një qeveri që punon për mirëqenien e tyre, që respekton fjalën e lirë dhe të drejtën e pronës, një qeveri që bën më të mirën për të siguruar të ardhmen e qytetarëve të saj. Fëmijët tanë meritojnë të rriten si shqiptarë europianë në Shqipërinë tonë të bukur, Shqipërinë si gjithë Europa. Dhe së bashku do ta bëjmë realitet!", vijoi kryedemokrati. Ndryshe nga vitet e tjera, Partia Demokratike këtë vit nuk festoi datën e themelimit të saj. Dy ditë më parë kryedemokrati Lulzim Basha dhe PD vendosën që fondin që kishin planifikuar për të festuar, ta alokuan për të ndihmuar qytetarët e prekur nga tërmeti i fuqishëm i 26 nëntorit. "Aktivitetet e planifikuara për 11 dhjetorin, ditën e themelimit të Partisë Demokratike janë anuluar dhe të gjitha fondet e përcaktuara për këto aktivitete se bashku me kontribute të anëtarëve dhe simpatizantëve të saj do të shkojnë në ndihmë të personave të goditur nga tërmeti i 26 nëntorit. Solidariteti me të dëmtuarit nga tërmeti dhe mbështetja maksimale për ta është mënyra më e mirë për të përkujtuar data të rëndësishme që shënojnë ngjarjet e Dhjetorit 1990, nga Lëvizja Studentore te shpallja e pluralizmit dhe lindja e Partisë Demokratike", njoftoi Basha dy ditë më parë. Ky nuk ishte aktiviteti i vetëm që anuloi PD pas tërmetit të 26 nëntorit. Po ashtu, Basha ndërpreu turin e takimeve me qytetarët për t'u shprehur atyre alternativën e opozitës dhe për të dëgjuar shqetësimet. "Më herët, Partia Demokratike anuloi aktivitetet për 28 nëntorin, gjithashtu u anuluan vizita të parashikuara jashtë vendit, ndërsa në Ditën e Rinisë, më 8 dhjetor, të rinjtë e Forumit Rinor e kthyen në ditë solidariteti, duke mbledhur dhe shpërndarë ndihma për familjet e goditura nga tërmeti", shkroi Basha.
Genc Pollo, ish- deputeti i PD- së ka kujtuar me një mesazh themelimin e Partisë Demokratike 29 vjet më parë. Bëhet fjalë për një foto me Preç Zogajn në ditën e shpalljes së themelimit të PD. Pollo thotë se ajo ngjarje ishte një kthesë madhore historike drejt demokracisë dhe Europës, duke theksuar se PD si në ato ditë, edhe sot ka përsëri rolin kyç në një tjetër kthesë historike.