29- vjetori i PD- së, Sali Berisha bën bilancin e arritjeve dhe gabimeve
Në 29- vjetorin e themelimit të Partisë Demokratike, ishkryetari i saj, Sali Berisha, risolli në vëmendje sfidat e shumta që pati qeveria e parë e djathtë, pasi mposhti të ashtuquajturin Hitlerin e Shqipërisë, për të arritur misionin e mbrojtjes së të drejtave dhe lirive të njerëzve. "PD dhe aleatët e saj erdhën në pushtet më 22 mars të vitit 1992, në vendin e tretë më të varfër të globit, në të cilin të ardhurat për frymë ishin vetëm 204 dollarë në vit, me vetëm 4 milionë dollarë rezervë valutore dhe një borxh të jashtëm 500 milionë dollarë dhe papunësi që kalonte mbi 80% dhe një inflacion tre e madje edhe katërshifror", shkroi Berisha. Por pavarësisht sfidave të shumta të brendshme, sipas Berishës, qeveria e djathtë arriti që të lidhte miqësinë me Amerikën, të ndërkombëtarizonte çështjen e Kosovës dhe të anëtarësonte Shqipërinë në Këshillin Europian. "Lokomotivë e integrimeve europiane dhe euroatlantike, qeveria e PD dhe aleatëve të saj në vitin 1995 e anëtarësuan Shqipërinë në Këshillin e Europës dhe në dhjetëra organizata ndërkombëtare si dhe firmosi ndër më të parat Partneritetin për Paqe me Aleancën e Atlantikut të Veriut. Ne Letrën e tij të Bardhë të vitit 1996, Komisioni Europian, duke vlerësuar suksesin e reformave, do përzgjidhte Shqipërinë si vendin e vetëm në rajon për të hapur negociatat për procesin e stabilizim- asociimit në BE", vijon statusin e tij Berisha. Po ashtu, ish kreu i PD- së njohu si gabim të selisë blu mosparandalimin në kohë të firmave piramidale.