“Nuk presim reflektim nga dhunuesi i Kushtetutës”
"Ne do të vazhdojmë të bashkëpunojmë me organin e Akuzës"
Presidenca nuk është surprizuar nga deklaratat e kreut të Këshillit të Emërimeve në Drejtësi, Ardian Dvorani, të bëra pasi ka dalë nga Prokuroria, ku u mor në pyetje për rreth tri orë.
Nëpërmjet një postimi në "Facebook", pas deklaratave të kreut të KED- së, zëdhënësi i Presidentit të Republikës, Tedi Blushi, është shprehur se Presidenca nuk ka pritur diçka më shumë nga ai, të cilin ai e quan shkelës të Kushtetutës dhe të ligjit. "Nga një dhunues me dashje i Kushtetutës dhe i ligjit, i mirëdokumentuar, i provuar dhe përsëritës në shkeljen e tyre, nuk presim asnjë reflektim publik. Ne do të vazhdojmë të bashkëpunojmë me organin e akuzës për të vendosur drejtësinë në vend. Ky proces do të jetë i hapur dhe transparent për opinionin publik vendës dhe ndërkombëtar, për të ndaluar kapjen totale të institucioneve të drejtësisë, përmes kapjes së Gjykatës Kushtetuese, institucionit më të rëndësishëm që garanton funksionimin e shtetit të së drejtës në Republikën e Shqipërisë", shkroi Blushi në "Facebook". Ndërkohë, kreu i KED- së, Ardian Dvorani, i pyetur për videot përvëluese të përmendura nga Presidenti Meta, i ka quajtur ato material artistik, filma me metrazh të shkurtër. Dy ditë më parë, në Prokurori ishte edhe Presidenti Meta, i shoqëruar nga dy këshilltarët e tij, Bledar Dervishaj dhe Tedi Blushi, për të dëshmuar në lidhje me padinë e bërë ndaj kreut të KEDsë. Pak orë pas përfundimit të seancës, Presidenca publikoi videon e përmendur më herët, ku rendiste shkeljet e Dvoranit. "KED është një organ kolegjial, që ka për detyrë nga ana administrative të ndihmojë Presidentin, Kuvendin dhe Gjykatën e Lartë, të zgjedhin anëtarët e Gjykatës Kushtetuese, për plotësimin e vakancave të tyre sipas radhës kushtetuese dhe kritereve që dikton qartë Kushtetuta dhe ligji për Gjykatën Kushtetuese. Justifikimi i maxhorancës për bllokimin e KED në vitet 2017 dhe 2018 ishte se anëtarët e KED nuk kishin kaluar procesin e vetingut. Por me zgjedhjen e Dvoranit, vetingu nuk ishte më kusht", thuhet në videon e publikuar nga Meta. Presidenti thekson se me këtë skemë të përdorur, kreu i KED tentoi që t'i jepte maxhorancës një anëtar më tepër në Gjykatën Kushtetuese. Si vazhdim i kësaj tentative, sipas Presidentit, ishte edhe shpallja në Fletoren Zyrtare si anëtare e Gjykatës Kushtetuese e Arta Vorpsit dhe mbajtja pezull e Marsilda Xhaferllarit. "Qëllimi i pastër i kësaj skeme të Dvoranit ishte t'i jepte maxhorancës në mënyrë të paligjshme një anëtar më shumë për të prishur balancat në Gjykatën Kushtetuese, duke vetëshpallur në kundërshtim me Kushtetutën, kandidaturën e paracaktuar të
Arta Vorpsit. Në funksion të këtij qëllimi, Dvorani botoi me iniciativë personale dhe në mënyrë antiligjore emrin e saj në Fletoren Zyrtare, në 9 nëntor 2019", thuhet ndër të tjera në video.
PËRPLASJA Presidenti Ilir Meta paditi Ardian Dvoranin se ka shpërdoruar detyrën pas debatit që u krijua mes Parlamentit dhe Presidencës për zgjedhjen e një anëtari të Gjykatës Kushtetuese. Kreu i shtetit akuzoi Dvoranin se në bashkëpunim me Parlamentin donin që të fusnin në kurth Presidentin për të shkelur ligjin për të zgjedhur dy anëtarët e tij të Gjykatës, pa respektuar procedurën dhe rendin kronologjik të zgjedhjes. KED i dërgoi Presidentit dy lista me kandidatë për të zgjedhur dy anëtarët e parë të Gjykatës Kushtetuese, por Meta zgjodhi vetëm të parin në listën e parë dhe më pas tha se sipas ligjit organik të Gjykatës Kushtetuese i takon Parlamentit të zgjidhte kandidatin e parë në mënyrë që më pas të zgjidhte ai të dytin. Por, parlamenti i zgjodhi të dy anëtarët e vet në një ditë brenda afatit. Më pas, kreu i shtetit në tejkalim të afatit zgjodhi anëtaren e tij të dytë, Marsida Xhaferlarin, e cila ishte renditur e 4- ta në listën e dytë të KED- së. Ndërkohë, në Kushtetutë parashikohet që zgjidhet anëtar i Gjykatës Kushtetuese një nga tre të parët të renditur nga KED.
Nga një dhunues me dashje i Kushtetutës dhe i ligjit, i mirëdokumentuar, i provuar dhe përsëritës në shkeljen e tyre, nuk presim asnjë reflektim publik