KUSH PERFITON
Apartamentet, kthehet amnistia si në vitin 2017
Kuvendi ndryshon skemën e rivlerësimit të apartamenteve. Sa ulet tatimi me vendimin e ri dhe tabela me çmimet e shtëpive në 32 zonat e Tiranës e gjithë vendin
Fill pas hedhjes së idesë për rikthimin e amnistisë, qëndrimet ishin të luhatura.
Deri vonë nuk dihej dhe s'mund të thuhej me siguri, nëse detyrimi tatimor për efekt të rivlerësimit të banesave, do të bëhej me 2 për qind, njësoj si në 2017- n apo me 3 për qind sa përflitej. Në amendamentin e hartuar nga kryetari i Komisionit të Ekonomisë, Arben Ahmetaj, parashikohej që tatimi të ishte 3 për qind. Por dje, gjatë diskutimit të nismës në Kuvend, deputetë të opozitës dhe maxhorancës kërkuan që tatimi të bëhet 2 për qind, sa edhe është aplikuar në 2017n. "Ndryshon pika dy, nga 3 për qind bëhet 2 për qind rivlerësimi", konfirmoi Ahmetaj dje pas votimit, ku shumica votoi pro variantit fillestar.
RIVLERËSIMI Prej 1 janarit deri në fund të muajit gusht, qytetarët të cilët duan të përditësojnë vlerën e banesës mund ta bëjnë këtë duke u taksuar vetëm me 2 për qind dhe jo 15 sa edhe është aktualisht. Nga nisma, për herë të parë do të përfitojnë edhe ato familje që kanë në posedim objekte që janë në proces legalizimi. "Subjekt i këtij ligji është edhe rivlerësimi i pasurive të paluajtshme të individëve: të cilët janë në proces legalizimi dhe regjistrimi të pasurisë, si edhe ata që kanë kontrata sipërmarrje dhe jetojnë në pallate ende të pa legalizuara. Kjo dispozitë synon të trajtojë raste të atyre individëve që janë në proces legalizimi të pasurive të paluajtshme apo edhe raste të individëve që kanë apartamente me kontratë porosie apo sipërmarrje, por për shkak të problemeve që ka shoqëria ndërtuese me mosrespektimin e lejes së ndërtimit, hipotekimi i pallatit nuk kryhet. Parashikimi bën të mundur që edhe ky individ të ketë të drejtë të rivlerësojë pasurinë e tij", thuhet në relacionin e ligjit. Rivlerësimi përveçse është një mënyrë për të përditësuar vlerën e banesës përkundrejt një detyrimi tatimor të reduktuar, është një mundësi e mirë edhe për ata që duan ta shesin më pas këtë pasuri, sepse në kohën e transaksionit do të paguajnë një tarifë më të reduktuar.
SI PËRFITOHET Publikimi i çmimeve minimale fiskale për çdo rreth iu vjen në ndihmë qytetarëve që të llogarisin faturën që u takon të paguajnë por njëkohësisht iu shërben për të kuptuar përfitimin që kanë nga kjo skemë. Konkretisht, nëse vlera fillestare e objektit është 3 000 000 lekë, për të bërë rivlerësimin shihet çmimi minimal fiskal, që aplikohet për zonën. Për shembull, nëse kjo banesë ndodhet në zonën kadastrale 2/ 5, çmimi fiskal që aplikohet është 80 000 lekë/ m2 shumëzuar me sipërfaqen, e cila në rastin konkret është 100 m2. Atëherë, vlera e përftuar është 8 000 000 lekë. Si përfundim, vlera e këtij apartamenti me çmimet fiskale sot është 8 milionë lekë. Qytetari mund të kryejë procedurën e rivlerësimit duke paguar vetëm 2 për qind ose ( 8 000 000- 3 000 000) * 2% = 100 000 lekë tatim. Nëse pas një viti, qytetari do të shiste pronën në vlerën 10 000 000 lekë, do të paguajë tatim mbi të ardhurat nga shitja e pronës në masën ( 10 000 000 - 8 000,000 vlera e rivlerësuar në kadastër) * 15% = 300 000 lekë. Por, nëse nuk do të bëhej ky rivlerësimi, atëherë tatimi që do të paguante mbi të ardhurat nga shitja e pronës do të ishte ( 10 000 000 - 3 000 000 vlera e vjetër e kadastrës) * 15% = 1 050 000 lekë.