Ministri i Jashtëm italian: Ulni tensionet politike dhe vendosni dialogun!
Di Maio: Mos komprometoni rrugëtimin e integrimit europian të Shqipërisë, shfrytëzoni më së miri potencialet në rritje të vendit
ARISTIR LUMEZI Ministri i Jashtëm italian, Luigi Di Maio, i kërkoi klasës politike shqiptare që të ulet në dialog për çështjet e integrimit europian të vendit.
Pas takimit me Kryeministrin Rama, në një konferencë të përbashkët për mediat, Di Maio tha se mungesa e dialogut kompromenton integrimin e vendit drejt BE- së. “Italia këmbëngul mbi nevojën e një vendimi pozitiv për të dyja vendet dhe për të caktuar edhe një datë për thirrjen e konferencës së parë ndërqeveritare dhe gjithashtu, edhe për një mandat për Komisionin për të përgatitur kuadrin e negociatave. Në këtë frymë, i shpreha Kryeministrit, urimin dhe dëshirën tonë, që të gjithë aktorët politikë të angazhohen më tej në rivendosjen e një klime politike të tillë, në mënyrë që të mos komprometojë rrugëtimin e integrimit europian të Shqipërisë dhe gjithashtu të bëjë të mundur që të shfrytëzohen më së miri dhe plotësisht potencialet në rritje të vendit, duke favorizuar dhe një ulje të tensioneve e një çelje apo hapjen të kanaleve të përballjes dhe të dialogut”, tha Di Maio. Ai përsëriti qëndrimin e Italisë në mbështetje të hapjes së negociatave. “Unë i theksova edhe njëherë Kryeministrit mbështetjen e palëkundur të Italisë në rrugëtimin europian të Shqipërisë dhe të Maqedonisë së Veriut dhe në vijim të vendimit për mosçeljen e negociatave të anëtarësimit me BEnë, që u mor nga Këshilli Europian në datat 17- 18 tetor”, tha ministri i Jashtëm italian. Ai u shpreh se disa vende të BE- së po pengojnë procesin e zgjerimit. “BE- ja, në mënyrë të natyrshme, duhet të përqafojë dhe të bëjë pjesë të saj vende si Shqipëria dhe Maqedonia e Veriut. Ne do ta mbështesim fuqimisht këtë në ditët në vijim, edhe ndaj atyre vendeve dhe kundër atyre vendeve që nuk janë në favor të zgjerimit të Bashkimit Europian dhe në njëfarë mënyre po gabojnë duke e penguar zgjerimin e mëtejshëm të BEsë”, nënvizoi Di Maio.
RAMA Duke falënderuar Italinë për mbështetjen që i ka dhënë Shqipërisë, Kryeministri Rama tha se asistenca e saj në Reformën në Drejtësi do të jetë konkrete. “Me ministrin kemi diskutuar dhe Reformën e Drejtësisë, edhe legjislacionin e ri kundër KÇK- së, pra, krimit të organizuar, kemi diskutuar edhe mbi njësinë speciale kundër korrupsionit. Ministri më ka konfirmuar atë që keni dëgjuar më parë, gatishmërinë e Italisë për të mbështetur jo thjeshtë në mënyrën tradicionale me asistencë teknike, por edhe me njerëz në terren, në bashkëpunim konkret dhe të përditshëm”, u shpreh Kryeministri Rama. Ai falënderoi Italinë dhe për mbështetjen e Shqipërisë në marrjen e Presidencës së OSBE- së. “Vitin e ardhshëm mbushen plot 10 vjet nga nënshkrimi i Deklaratës së Partneritetit Strategjik të Shqipërisë me Italinë dhe ne duam që këtë partneritet strategjik ta thellojmë duke vazhduar të afrohemi në të gjitha fushat e interesit të përbashkët. E faktikisht, interesi i përbashkët është gjithmonë e më evident, në një kohë dhe në një botë ku jetojmë, që bëhet gjithmonë e më komplekse. Dua ta falënderoj ministrin për mbështetjen që Italia ka dhënë për marrjen e kryesisë së OSBE- së nga Shqipëria dhe dua ta siguroj që në këtë funksion, ne do të bëjmë më të mirën dhe do të jetë një vlerë e shtuar në bashkëpunimin tonë”, u shpreh Kryeministri Rama. Ai vlerësoi partneritetin ekonomik me Italinë. “Marrëdhënia me Italinë është një marrëdhënie e shkëlqyer, dhe më vjen shumë mirë, edhe me qeverinë e re italiane. Italia ka qenë dhe mbetet partneri ynë kryesor, i pari në marrëdhëniet ekonomike- tregtare dhe vendi që nuk është kursyer asnjëherë në mbështetje të transformimit të Shqipërisë nga një diktaturë, në një demokraci funksionale”, tha Rama.