PD: 400 familje në Shijak, pa shtëpi dhe pa informacion se ç’do të bëhet
Tërmeti i 26 nëntorit ka lënë pa strehë rreth 400 familje që jetonin në 20 pallate, të cilat janë shpallur të pabanueshme. Por, sipas ish- deputetes së PD- së, Dhurata Çupi, pas fatkeqësisë natyrore, ata po përballen me një tjetër tërmet, që është mungesa e informacionit se çfarë do të bëhet me ta. Çupi akuzon qeverinë se shpërndan ndihmat sipas preferencave politike. "Në Shijak, tërmeti nuk është ndierë vetëm si fatkeqësi natyrore, pasi këtu vazhdon edhe tërmeti qeverisës. 20 pallate te dëmtuara dhe që do të shemben me nga 20 familje për pallat. 400 shtëpi për t'u shembur. Asnjë informacion se çfarë do të bëhet me këto familje. Ndarjet e ndihmave preferenciale, sipas përkatësisë politike. Kjo është situata në Shijak dhe në çdo qytet që i preku tërmeti. Besimin zero te qeveria, dhe pa shprese për zgjidhje", shkroi dje ish- deputetja në një status në "Facebook", teksa ishte në Shijak. Ndërkohë, nënkryetari i LSI- së, Petrit Vasili i ka kërkuar Prokurorisë që të hetojë qeverinë për mosveprim dhe për neglizhencë të një rekomandimi të bërë nga Kontrolli i Lartë i Shtetit në korrik të këtij viti për kontrollimin e cilësisë së veprave ndërtimore. "Pse nuk heton Prokuroria për refuzimin arrogant nga qeveria të rekomandimeve të Kontrollit të Lartë të Shtetit, që dha alarmin për cilësinë e ndërtimit? Tërmetet e 26 nëntorit dhe 21 shtatorit treguan qartë se gjatë verifikimit të pasojave të rënda që ato lanë pas, kishte paaftësi të theksuar teknike", shkroi Vasili. Ndërkohë, akuzoi kreun e qeverisë se është i paaftë për të menaxhuar situatën.