Tragjedia e 26 nëntorit, deri tani 9 të arrestuar e 8 në kërkim
Nëntë persona u arrestuan dhe tetë të tjerë u shpallën në kërkim policor, mes tyre zyrtarë, ish- zyrtarë, ndërtues e inxhinierë, që akuzohen direkt dhe indirekt për tragjedinë e 26 nëntorit. Prokuroria e Durrësit në bashkëpunim me Policinë e qytetit bregdetar kanë konkluduar një pjesë të hetimeve, që kishin të bënin me objektet që shkaktuan viktima. Sikurse ishte paralajmëruar, të shtunën u arrestuan 9 persona dhe u shpallën në kërkim 8 të tjerë, ndërkohë që katër prej tyre janë vënë në akuzë për "Vrasje" me dashje për 24 viktimat e tërmetit në Durrës. Në arrest është vendosur dhe shefi i shërbimit të Kavalishencës, ku gjeti vdekjen kryekomisari Bajram Hajdarmataj. Drejtori i Policisë së Durrësit, Lorenc Shehu, bëri bilancin e hetimeve të deritanishme, ku komunikoi para medias prerjen e 17 fletëve të arrestit, për persona që akuzohen direkt dhe indirekt për 24 viktimat e tërmetit. Në listën e bërë publike prej Policisë, mes 9 të ndaluarve është dhe 53vjeçari Kujtim Hasa, në cilësinë e shefit të shërbimeve të shtëpisë së pushimit të Ministrisë së Brendshme. Ndërkaq, Ahmet Doda, 52 vjeç, drejtor i këtij institucioni, është ndaluar me akuzën "Shpërdorimi i detyrës". Në pranga janë vënë edhe dy ndërtues informalë: 79vjeçari Rruzhdi Xheka për objektin Hotel "Mira Mare", ku humbën jetën 2 shtetas dhe Avdulla Osmani, 61 vjeç, për ndërtimin në "Hotel Tropikal", ku humbën jetën 2 shtetas kosovarë. Sipas Prokurorisë, nga ana e ndërtuesve formalë dhe informalë të këtyre objekteve ndërtimi ka rezultuar se në kundërshtim me rregullat dhe normat në fushën e ndërtimit dhe konkretisht për shkak të dëmtimit në strukturën e objekteve, kanë sjellë si pasojë vdekjen e disa personave të ndarë sipas objekteve përkatëse.