Prostitucion e kokainë, në pranga menaxherët e këngëtari
Shpallet në kërkim pronari i lokalit, në hetim balerina
Forcat Speciale RENEA blinduan gjatë natës qytetin e Shkodrës, duke finalizuar operacionin policor të koduar “Klubet e natës”, për goditjen e prostitucionit dhe shpërndarjes së drogës.
Në pranga përfunduan 3 persona, dy menaxherët e një lokali dhe këngëtari, ndërsa u shpall në kërkim pronari. Policia tha se u procedua në gjendje të lirë edhe një balerinë, e cila dyshohet se shfrytëzohej për prostitucion. Sipas burimeve zyrtare të Policisë, operacioni u krye në funksion të hetimeve proaktive disamujore, të realizuara nga Sektori për Hetimin e Narkotikëve në Policinë e Shkodrës, në bashkëpunim me Prokurorinë, për dokumentimin dhe goditjen e veprimtarisë kriminale të shpërndarjes së lëndëve narkotike në klubet e natës dhe vënies së ambienteve të lokalit për ushtrimin e prostitucionit, në Qarkun Shkodër. Kontrollet janë shtrirë në shumë lokale dhe klube nate në Qarkun Shkodër. Pas një pune të mirorganizuar nga strukturat e Drejtorisë Vendore të Policisë Shkodër, në bashkëpunim me Prokurorinë, me mbështetjen e Forcave Speciale RENEA, u organizua dhe finalizua operacioni policor, pas hetimeve të kryera si rezultat i procedimit penal të vitit 2019.
ARRESTIMET Si rezultat i operacionit, u bë kapja dhe arrestimi i shtetasve Aldo Vruçaj, 29 vjeç, menaxheri i klubit, lindur dhe banues në Shkodër, i dënuar më parë për veprën “Prodhimi dhe shitja e narkotikëve”; Gasper Marku, 27 vjeç, menaxher i klubit, lindur dhe banues në Shkodër, i arrestuar më parë për të njëjtën vepër penale “Prodhimi dhe shitja e narkotikëve, në bashkëpunim”; Zamir Jakupi, 57 vjeç, këngëtar në klub, lindur në Muriqan e banues në Shkodër. Gjithashtu, u bë shpallja në kërkim policor e pronarit të lokalit, shtetasit E. M., si dhe u proceduan në gjendje të lirë shtetasit Ç. P., 33 vjeç, lindur dhe banues në Shkodër ( klient) dhe L. S., 31 vjeçe, banuese në Shkodër ( balerinë). Nga hetimet e kryera ka rezultuar se të gjithë këta shtetas, në bashkëpunim me njëritjetrin dhe persona të tjerë, kanë shitur dhe shpërndarë lëndë narkotike të llojit kokainë, si dhe kanë vënë në dispozicion ambientet e lokalit për përdorimin e drogave, gjithashtu edhe për ushtrim prostitucioni. Në momentin e kontrollit, Policia ka sekuestruar një sasi të vogël lënde narkotike kokainë dhe sende të tjera që shërbejnë për përdorimin e lëndëve narkotike, 5 aparate celulare dhe dokumentacionin e lokalit ku ushtrohej ky aktivitet.