EMRAT E ISSH Pensionet, kategoritë që marrin shtesën e re
Zbardhen kategoritë që marrin shtesën deri në 5 mijë lekë në muaj. Llojet e punës që përfitojnë dhe emrat e pensionistëve sipas qyteteve
Nga rritja e pensioneve nuk do të përfitojnë të gjithë, por vetëm ata që kanë ushtruar profesione të kategorizuara të vështira dhe shumë të vështira.
Ndonëse ka 6 muaj që është miratuar ligji dhe gati një muaj që ka nisur të llogaritet shtesa për minatorët, naftëtarët dhe metalurgët, ende ka paqartësi lidhur me kategoritë që përfitojnë. Gazeta boton sot listën e profesioneve që janë pjesë e skemës. Të gjithë ata që kanë ushtruar një nga profesionet e listuara në tabelë, mjafton të kenë kryer deri në 6 vite punë brenda sektorit për të përfituar nga rritja. Për minatorët, shtesa llogaritet me 1 për qind mbi masën e pensionit për çdo vit kontributiv. Ndërsa për minatorët dhe naftëtarët, 0.6 për qind. Bashkë me listën e kategorive, gazeta boton edhe pesë listat zyrtare të Institutit të Sigurimeve Shoqërore, për ata që ka përfunduar llogaritja. Pensionistët që kanë emrin në listë, mund të paraqiten në çdo pikë shpërndarjeje për të tërhequr shtesën.
PROFESIONET
Armator në nëntokë; vagonist dhe transportues me skrepër në nëntokë; makinist i sharrave prerëse në nëntokë; pompist i brendshëm në nëntokë; turbist në nëntokë; arganist në nëntokë; sondist në nëntokë etj., janë disa nga profesionet nga radhët e minatorëve që do të trajtohen me pensione suplementare. Ndërkohë, në industrinë e naftës dhe gazit përfshihen punë të vështira: saldator dhe elektrosaldator në rezervuar, kulla dhe cisternë, punëtor i pastrimit të brendshëm të rezervuarëve, depove dhe cisternave të naftës, sektori i nxjerrjes së naftës dhe të gazit, sektori i punimeve gjeologo- gjeofizike në naftë edhe gaz etj.. Ndërsa në metalurgji, si punë të vështira klasifikohen punëtorët e shkrirjes dhe derdhjes së metalit, punët shumë të vështira në metalurgjinë e zezë e ferrokrom si p. sh. në uzinën e petëzimit, në uzinën e gizës, në repartin e pjekjes, në uzinën e çelikut etj..
APLIKIMI
Për të përfituar shtesën, e cila shkon deri në 5 mijë lekë në muaj për ata që kanë mbi 25 vite punë, pensionistët duhet të dorëzojnë: kërkesën për përfitimin e shtesës mbi pension sipas formatit tip të miratuar nga ISSH- ja. Së dyti, fotokopjen e dokumentit të identifikimit, të nënshkruar personalisht, i cili duhet të jetë brenda afatit të vlefshmërisë. Së fundmi, çdo dokumentacion tjetër që vërteton llojin dhe periudhën e punës për efekt pensioni. Ata të cilët i kanë dorëzuar këto dokumente, nuk kanë asnjë detyrim tjetër shtesë. Prej gati një muaji, ISSG ka nisur llogaritjen për aplikimin e shtesës dhe përgjatë ditëve në vijim do të shpallen edhe listat e përfituesve.