Haradinaj: S’duam Mini- Shengen me lider Serbinë
Edita Tahiri: Kjo nismë krijon bërthamën për "Serbinë e Madhe"
Kryeministri në detyrë i Kosovës, Ramush Haradinaj, është shprehur sërish kundër nismës së vendeve të Ballkanit Perëndimor, të quajtur ndryshe si "Mini- Shengeni i Ballkanit Perëndimor". Sipas Haradinajt, Kosova nuk ka nevojë për një nismë të tillë me kryeqytet Beogradin, pasi është totalisht e orientuar drejt Brukselit dhe Bashkimit Europian. Haradianaj shtoi se ideja e Mini- Shengenit është heqja e taksës që Kosova i ka vendosur produkteve serbe. "Të gjitha vendet e Ballkanit Perëndimor, pra 6 që kanë mbetur pa u anëtarësuar në BE, kemi marrëdhënie kontraktuale me BE- në. Pra, secili vend ka kontratë me BE- në, Kosova e ka MSA- në dhe ne duhet me iu fokusuar MSA- së. Pra, nuk kemi nevojë për një MiniShengen me kryeqytet Serbinë ose lider Serbinë të Mini- Shengenit tonë. Jemi të interesuar për Shengen në këtë rast, me kryeqytet Brukselin, pra BE- në. Kosova është vend euroatlantik, pra kjo është perspektiva jonë. Hetohet që krejt kjo bëhet në njëfarë mënyre me na e heq taksën, është një by- pass për me e heq taksën. Krejt Mini- Shengeni vetëm një qëllim e ka, një sukses nëse kish mujt me e heq taksën", u shpreh Haradinaj. Shumë i ashpër në kundërshtimin e Mini Shengenit ishte edhe Jakup Krasniqi, ish- kryeparlamentari i Kosovës. Në një koment në rrjetet sociale, Krasqini thekson se ngritjen e urave të komunikimit shqiptarët fillimisht duhet ta bëjnë mes tyre dhe më pas me vendet e Rajonit. "Në fakt, askush nuk duhet të jetë kundër ndërtimit të urave të së ardhmes, por, urat e së ardhmes mes vendeve të ndryshme nuk ndërtohen njëanshmërisht, ato ndërtohen me vullnetin e të gjithëve, duke u shkëputur nga e kaluara që prapa ka lënë shumë plagë të përgjakura. Sigurisht që duhet të ndërtohen ' ura miqësie e bashkëpunimi', por, ne shqiptarët, së pari duhet t'i ndërtojmë urat vëllazërore mes veti, urat e dëmtuara të së djeshmes e së sotmes sonë. Kur ta kemi bërë këtë hap, nëse ata që deri dje kanë shkatërruar çdo urë miqësie e bashkëpunimi, duke lënë prapa lumenj gjaku e plagë të hapura me dhimbje të mëdha njerëzore, nuk e di sesa lënë mundësi për ndërtim të ' urave miqësie e bashkëpunimi', shkruan Krasniqi. Po ashtu edhe ish- kryenegociatorja për bisedime teknike në dialogun Kosovë- Serbi ka kritikuar ashpër Kryeministrin Rama për idenë e Mini- Shengenit Ballkanik, duke thënë se ajo krijon bërthamën ekonomike për Serbinë e Madhe. "Se ideja e MiniShengenit krijon bërthamën ekonomike për ' Serbinë e Madhe', këtë gjithë shqiptarët po e shohin, përveç Edi Ramës. E lumtur me reagimet e mençura dhe strategjike të shqiptarëve për të mbrojtur interesat kombëtare", ka shkruar Tahiri.