Skandal, Këshilli i Qarkut shpall Haxhi Lleshin “Nderi i Dibrës”, reagon PD
Kreu i ri i ISKK: Haxhi Lleshi firmosi dënimet me vdekje
Kreu i ri i Institutit të Studimit të Krimeve dhe Komunizmit, Çelo Hoxha, u zgjodh dje me 4 vota, përkundrejt 3 votave që mori Erald Kapri, ndërsa dy kandidatët e tjerë nuk morën asnjë votë, nga Bordi Drejtues.
Zgjedhja e kreut të ri të Institutit të Studimit të Krimeve dhe Komunizmit, vjen pas dorëheqjes së Agron Tufës, i cili u largu drejt Zvicrës, ku kërkoi azil politik, për shkak të kërcënimeve me jetë që kishte marrë vazhdimisht për shkak të detyrës që mbante. Po dje, Hoxha, në një prononcim të parë të tij për "News 24", dënoi ashpër shpalljen "Nderi i Qarkut Dibër" për Haxhi Lleshin. Hoxha e cilësoi Haxhi Lleshin si njeriun që firmoste dënimet me vdekje për arsye politike gjatë regjimit komunist. "Institucioni i Presidiumit të Kuvendit Popullor ka dhënë dënime me vdekje, që kanë qenë dënime politike. Kjo është përgjegjësi direkte e kreut të këtij institucioni, siç ishte Haxhi Lleshi, sepse ka firmosur dokumente. Nderimi që i bëhet në nivelin lokal Haxhi Lleshit, tregon kaosin moral, në të cilën ndodhet shoqëria shqiptare", u shpreh Hoxha. Kreu i ri i Institutit të Studimit të Krimeve dhe Komunizmit shpreh domosdoshmërinë e miratimit të dy ligjeve nga parlamenti shqiptar, ligjit të Lustracionit dhe Dekomunistizimit. Sipas tij, dy ligjet e munguara për 30 vite do t'i prisnin rrugën glorifikimit të personave që kanë kryer krime gjatë diktaturës, si dhe qëndrimit të tyre në pushtet. "Ligji i lustracionit do të pengonte ish- zyrtarët e institucioneve represive të diktaturës, që të merrnin pjesë në administratën e sotme. Ndërsa ligji i dekomunistizimit do të pengonte përveç përdorimit të shumë simboleve, edhe nderimin e personazheve të atij regjimi", u shpreh Hoxha. Sipas Hoxhës, Haxhi Lleshi përfshihet në listën e përpiluar nga Instituti i Studimit të Krimeve dhe Pasojave të Komunizmit, që përmbledh pjesëmarrësit që kanë përgjegjësi direkte për krimet e Partisë Komuniste Shqiptare dhe të Ushtrisë Nacionalçlirimtare. Në vitin 1995, me dekret të Presidentit të Republikës, Haxhi Lleshit iu hoqën të gjitha dekoratat dhe titujt e nderit për aktin kriminal të gjenocidit të ushtruar ndaj popullit shqiptar gjatë viteve të diktaturës komuniste.