Tërmeti, Bashkia Durrës akordon 310 milionë lekë
U miratua buxheti prej 2 miliardë e 995 milionë lekësh
Këshilli Bashkiak i Durrësit miratoi unanimisht projektbuxhetin e vitit 2020. Ai kap vlerën e 2 miliardë e 995 milionë lekëve të rinj dhe ashtu siç pritej, një pjesë e konsiderueshme është parashikuar për eliminimin e dëmeve të shkaktuara nga tërmeti i 26 nëntorit. Krahasuar me buxhetin e vitit 2019, është afro katër për qind më i lartë. Bashkia e Durrësit, nëpërmjet mbledhjes së taksave ka arritur të sigurojë pak më shumë se gjysma e kësaj shume, pra afro 59 për qind. Ndërkohë, qeveria do të akordojë 41 për qind të shumës. Rreth 58 për qind e buxhetit do të shkojë në infrastrukturë, arsim, menaxhim mbetjesh dhe transport urban, ndërkohë që 42 për qind do të shkojë për personelin. Si asnjëherë më parë, mbledhja zgjati vetëm 15 minuta, pasi të gjithë këshilltarët votuan në unanimitet pro buxhetit 2020. Të pranishëm në mbledhjen e radhës ishin 41 këshilltarë, të gjithë të Partisë Socialiste, ndërkohë që katër prej tyre u betuan pikërisht pak minuta para se të kalohej në votim buxheti. Ndryshe nga vitet e kaluara, ku miratimi i buxhetit jo vetëm që kalonte në një sërë seancash maratonë dhe shoqërohej për ditë e ditë me radhë me debate të ndërsjella, mbrëmjen e djeshme janë dashur vetëm 15 minuta që buxheti prej afro 30 milionë dollarësh të kalonte. Të gjithë këshilltarët ngritën kartonin jeshil, duke u hapur rrugë investimeve të bashkisë për vitin e ardhshëm. 10 për qind e shumës totale të buxhetit të vitit 2020, ose më saktë 310 milionë lekë të rinj, janë parashikuar për rindërtimin e ndërtesave të shembura dhe dëmtuara rëndë. Nga kjo shumë, 150 milionë do shkojnë për rindërtimin e ndërtesave të shembura, 100 milionë për riparimin e fasadave dhe mureve të dëmtuara, ndërsa me 60 milionë lekë do të paguhet skuadra prej 100 punëtorësh, që ndërmarrja "Rruga" e bashkisë ka përzgjedhur për kryerjen e punimeve në banesat e dëmtuara. Përveç fondeve të drejtpërdrejta, për llogari të ndërtesave të dëmtuara nga tërmeti do të shkojë edhe gjysma e fondit, që është parashikuar për investimet në buxhetin e vitit 2020. l. m