Kuvendi zgjedh kontrollorin e drejtësisë së re për 30 ditë
ILD shqyrton ankesat dhe heton shkeljet e magjistratëve
Këshilli i Emërimeve miratoi dje listën për renditjen e 5 kandidatëve për Inspektor të Lartë të Drejtësisë, ku në krye të listës është Avokati i Shtetit, Artur Metani, dhe i dyti prokurori Sokol Stojani.
Kjo listë, brenda tri ditësh nga miratimi, do të dërgohet në Kuvend për votim. Si organ emërtese, Kuvendi ka kohë një muaj nga marrja e listës që të zgjedhë një nga kandidatët e renditur nga KED. Nëse Kuvendi nuk arrin shumicën e duhur brenda kësaj kohe, atëherë emërohet i rendituri i pari në listën e dërguar nga KED. "Këshilli i Emërimeve në Drejtësi, në mbledhjen e tij të datës 23.12.2019, sipas rendit të përcaktuar të ditës, vendosi: Të miratojë listën përfundimtare të renditjes së kandidatëve të lejuar për Inspektor të Lartë të Drejtësisë, shpallur nga Këshilli i Emërimeve në Drejtësi në datën 01.03.2019 dhe rishpallur për plotësimin e kandidaturave në datën 09.09.2019", njoftoi dje KED. Lista do t'i dërgohet Kuvendit të Republikës së
Shqipërisë brenda tri ditëve, shkruhet më tej në njoftim.
ILD
Inspektori i Lartë i Drejtësisë, organ i cili, duke iu referuar parashikimeve ligjore, duhet të ishte ngritur 3 vite më parë, është më i rëndësishmi në hierarkinë e institucioneve të reja të krijuara si rezultat i Reformës në Drejtësi. "Inspektori i Lartë i Drejtësisë është autoriteti shtetëror përgjegjës për verifikimin e ankesave, hetimin e shkeljeve disiplinore dhe për fillimin e procedurës disiplinore ndaj gjyqtarëve dhe prokurorëve të të gjitha niveleve, anëtarëve të Këshillit të Lartë Gjyqësor, anëtarëve të Këshillit të Lartë të Prokurorisë dhe të Prokurorit të Përgjithshëm, si dhe për inspektimin institucional të gjykatave dhe të zyrave të Prokurorisë", shkruhet në ligjin për institucionet e reja. Gjithashtu, Inspektori i Lartë i Drejtësisë kryen inspektime institucionale e tematike mbi çdo aspekt të punës së gjykatave, administratës gjyqësore, zyrave të prokurorive dhe administratës së Prokurorisë, bazuar në kërkesën e motivuar me shkrim të Këshillit të Lartë
Gjyqësor, të Këshillit të Lartë të Prokurorisë, të ministrit të Drejtësisë, të Prokurorit të Përgjithshëm dhe në planin vjetor të inspektimeve.
KANDIDATËT
I renditur me më shumë pikë rezulton Artur Metani, i cili ka mbajtur detyrën e Avokatit të Shtetit. I dyti është renditur prokurori Sokol Stojani, me 89 pikë. Pas prokurorit vjen juristja Joana Sorraj, e cila është edhe këshilltare ligjore pranë Komisionit të Pavarur të Kualifikimit. Eris Hysi, juriste, është renditur e katërta në listën paraprake të nxjerrë nga KED. Ndërsa e fundit me 63.4 pikë është renditur Lindita Troja. Në garë për ILDnë fillimisht ishin 13 kandidatë, të cilët u skualifikuan nga Këshilli i Emërimeve në Drejtësi. Zvogëlimi i listës bëri që në gusht gara të shtyhej, pasi në garë duhet të ishin minimumi 5 kandidatë, ndërkohë që kishin mbetur vetëm 4. KED hapi sërish vendet vakante dhe pas një muaji, numri i kandidatëve i parashikuar në Kushtetutë u plotësua dhe vazhdoi procesin me pikëzimin dhe në mbledhjen e djeshme miratoi listën përfundimtare. Në listën fillestare të kandidatëve ishin juristë, të cilët më herët apo aktualisht ishin në poste në administratë, gjyqtarë dhe avokatë.